31-пи августдиъ Табасаран райондин АхьитI гъулаъ, дибдиан рас апIбалан кьяляхъ, культурайин цIийи хал абццну. Шадлугънан мярака АхьтIарин культурайин хулан директорин вазифйир тамам апIурайи Аьйшат Агъасиевайи ачмиш гъапIнийи.
«Гьюрматлу хялар ва гъуландар, му серенжемдиз ккилигури, АхьтIарин гъулан жямяаьтдин гизаф вахт вуйи. Магьа, дибдиан рас апIбалан кьяляхъ, гъи АхьтIарин культурайин хулан раккнар тIаъра. Культурайин хал – гъулан юкIв ву, диди вари уьмур улупура, думу инсанарихьди рягьятвал гъадабгъуз гъитру ва юкIвар ачухъ апIру идара ву. Мушваъ гьарсар касдихьан чан кIваз хуш вуйи ляхниин маракьлу хьуз шулу: мяълийир, ялхъвнар апIбан, шиклар зигбан жюрбежюр кружкйириз гъягъюз, ккунирихьан театрин ляхнаригъра гъючIвуз шулу. Гьамциб уткан культурайин хулаъ гъахурайи шадлугънан мяракйириз гъюз гьарсар касдин иштагь шулу. Учу, АхьитI гъулан жямяаьтди, культурайин хал ачмиш апIбак пай кивдариз, иллагьки Табасаран райондин глава Мягьямед Къурбановдиз, аьхю чухсагъул кIурача», – гъапнийи дугъу.
Чан терефнаан Мягьямед Къурбановдира АхьтIарин гъулан жямяаьт культурайин хал цIийи алапIбахъди мубарак гъапIну.
– Ухьу гъи ихь культура за апIурахьа. Культурайин хал – думу гирами йишв ву, халкьди душваъ улихьдин деврарин шей’ар, тарих уьрхюру. Гьамциб культурайин хал багарихьди Улуз гъулаъра ачмиш апIиди. Культурайин хулар цIийи алаъбан ляхнар жара гъулариъра давам апIбанди вуча. Гъит му культурайин цIийи хал АхьитI гъулан жямяаьтлугъдин хайирназ ишлетмиш апIруб ибшри! – къайд гъапIну райондин кIулиъ айири.
АхьитI гъулан советдин глава Рустам Шихмягьямядовди уч духьнайидариз культурайин ужагъдин тарихдикан ктибтнийи ва аьхи-римжи йисари думу фициб гьял ади гъабхьнуш, кIваин гъапIнийи.
«Магьа саб бицIи вахтнан арайиъ думу лап дибдиан рас гъапIну. АхьитI гъулан агьали, «Ерли жягьтлувалар» проектдин меценат, Дагъустан Республикайин Халкьдин Собраниейин депутат Сефер Аьлиевдиз аьхю чухсагъул пуз ккундузуз», – гъапнийи советдин главайи.
Сефер Аьлиевдира гъуландар шадлу гьядисайихъди мубарак гъапIнийи ва гъулан жямяаьтдин яшайиш ккабалгбаъ учв кюмек тувуз гьарган гьязур вуйиваликан гъапнийи. Дугъу, АхьтIаринна Рушвларин гъуларин арайиъ йишв улупиш, бицIидарин багъ ва бицIидариз тамшир апIру майдан тикмиш апIурза кIури, гаф тувнийи, ва Мягьямед Къурбановдикан АхьтIарин культурайин хал лазим вуйи вари авадлугъарихъди, аппаратурайихъди ва жара лазим вуйи шей’арихъди тямин апIуб ккун гъапIнийи.
Шадлугънан серенжем, уьру лента гьадабтIбан кьяляхъ, культурайин хулан айитI давам гъабхьнийи. Душваъ Табасаран райондин Кьасум Мягьямедовдин ччвурнахъ хъайи искусствйирин мектебдин АхьитI гъулаъ айи, Агъамирза Агъасиевди регьбервал туврайи бицIидарин ялхъвнар апIру ансанбли марччлихънарин ялхъван улупнийи.
ЦIийиди ишлетмишвалаз тувнайи культурайин хулакк АхьтIарин гъулан почтайин отделениера ерлешмиш дубхьна, думура дибдиан рас дапIна. Дидин начальник Расул Ярягьмедовдира рас апIбан ляхнариз кюмек туву касариз аьхю чухсагъул кIурайи.
Му гъулаъ гьацира цIийи мектеб ва цIийи мист дапIна. Дупну ккундуки, далу терефнаъ айи АхьтIарин девлетлу касари, спонсорари чпин гъулан жямяаьтдин яшайиш ужу хьпан бадали, пулин дакьатариинди аьхю кюмекар апIура. Дурарикан чпин гъуландар лап разиди ву. Гьаци, АхьтIарин ФАП-дин заведующий Фериде Гьясанбеговнайи узуз ктибтганси, гъулан ФАП Москвайиъ дуланмиш шулайи АхьитI гъулан агьали Мурадхан Исламовдин кюмекниинди 2008-пи йисан дивуб ву. Жара гъуларианра далу терефнаъ яшамиш шулайи девлетлу касари чпин гъулариз кюмек апIури гъахьнийиш, Табасаран райондин гъуларин яшайиш бицIи вахт-нан арайиъ лап улихь гъябгъюб мумкин вуйи. Табасаран райондин имбу гъуларира му аьдат гьяракатнаъ ипур кIури, умуд кивдихьа.
