Дагъустан Республикайин транспортдинна рякъярин мяишатдин министерствойин гьюкуматдин программа уьмриз кечирмиш апIури, гьаму йисандин аьхириз республикайин мяна айи Мамедгъала–Хючна рякъюн 16-пи ва 28-пи километрин участокдин 4 километр рякъ рас апIиди. Мидин гьякьнаан министерствойин пресс-гъуллугънан кIули айи Заира Гьясанбеговайи хабар тувра.

 

Къайд апIурача, му рякъ рас гъапIган, Мягьячгъалайиан Хючназ вуйи рякъюн манзил 40 километрин жикъи хьибди, ва гьацира Хючнаан Хив райондиз гъягъюзра рякъюн манзил хайлин кам шула. Мидланра гъайри, думу рякъ гъулан мяишат, туризм артмиш апIуз ва районарин культурайинна экономикайин аьлакьйир уьрхюз аьхю мяна айиб ву. 

«Гьамусяаьт думу рякъюн кIекIел алабхьнайи пайну рякъюъди гъягъюрайи машинариз ва рякъюхъди хъайи гъулариз цIиб гъулайсузвалар яратмиш апIура. Гьаддиз  рякъ’ин асфальт улубзбан къарар адабгъну. 

Гьар йигъан му объектдиин 20-дихьнакьан деврин тIалабариинди либхру рякъюн техникайихъди ляхин апIури, гъийин йигъаз, 4 километрин манзилнаъ кьюб жар асфальтра улубзну, вари гьязурлугвалар дапIну ккудукIна. Гьятта газдин турбйирра ва электрикдин симарра, рякъюз машат дарапIруганси, гъирагъдизди алдагъну. Анжагъ рякъюн гъирагъар дюз апIуз ва рякъярихъ шлу лишнар дивуз ими», – къайд гъапIну Заира Гьясанбеговайи.

Дупну ккундуки, асфальт улубзуз гъубзрайи 12 километр рякъюн расвалин ляхнар 2022-пи йисан октябриъ ккудукIну, сарун Мамедгъала-Хючна вари рякъ либхуз хъюбгъди.