Табасаран райондин ЭГС-дин начальник Гьяжимягьямед Гюловди туву мялуматариинди, кьюрдухьна гьязур шули, гьамусяаьт райондиъ газарин гъурулуш рас апIувалин жюрбежюр ляхнар кIули гъахура.
«Табасаран райондиз 74 гъул дахил шула. Вари гъулариз газ дизигна. Социальный объектар гьязур дапIну, газ хъипбан бадали, Табасаран райондин ЭГС-дин улихь аьхю месэлйир дийигъна. Гъийин йигъаз СиртIич гъулаъ айи сабпи ГРП-йиъ (газ пай апIру пункт) гьязурлугваларин ляхнар дапIну ккудукIна, вари райондиъ 45 ШРП (газдин давление албагру шкаф) ва 300 РДНК-йир (газдин давление албагру гъурулуш) а. Дюзди кIуруш, ццийин йисан хайлин ляхнар планламиш дапIнашра, расвалин ляхнар тамам апIбан бадали, Дагъустан Республикайиан Табасаран райондин ЭГС-диз пул деебтнадар. Хючнаан Гурихъна гъябгъюрайи газдин турба 850 метрин манзилнаъ зат дидригъди гьюдюхну ккунду, думу лап аварийный гьялнаъ а. Гьацира СиртIчан Гюгьрягъна гъябгъюрайи, 219 миллиметрин ацIушин айи турбайинра 2000 метр гьюдюхну ва рас дапIну ккунду, гьацира 7 ШРП-ра. Гьаму нукьсанвалар арайиан адагъбан бадали, кIулин тешкилатдиз лазим вуйи кагъзар, тялукь актар, шиклар ва участокариъ лихурайи пишекрарин аьрзйир хъадаъна
Табасаран райондин ЭГС-дин гъуллугъчйири абонентарин газар хъирчбан ва хътатIбан ляхнарра кIули гъахура. Гьаци 2021-пи йисан 41 абонентдин аьрзйириинди газар хътатIбанна хъирчбан 113268 манатдин ляхнар тамам дапIна. 74537 манат харж дапIну 27 касдин газар хъитIну, 403 касдин счётчикар кадагъну китIну, 453781 манатдин ляхнар тамам гъапIну. Газдин гьисаб гъабхру приборар (ПУГ) 10 касдин хуларик китIну, 33155 манатдин ляхнар гъапIну.
Саб вуйи ГРО (газ пай апIру тешкилат) тешкил апIбан бадали, рас апIбан ляхнариз материалар деетури адар, гьаз гъапиш райондиъ газдин турбйирин швнур-сар аьхюдар а, дурарихъди йикьрар дийитIну адар», – къайд гъапIну Гьяжимягьямед Гюловди.
