9-пи октябриъ Табасаран райондиъ, Ургур чвуччвунна чар чуччун гъалайиин, табасаранарин медениятдин фестиваль кIули гъябгъиди. Думу ДАССР арайиз дуфну 100 йис тамам хьпаз ва Надир-шагьдин кьушмар дагъитмиш дапIну 280 йис тамам хьпаз бахш дапIнайиб ву. Фестивалин дахилнаъди илминна тажрубайин конференцияра гъабхуз планламиш дапIна.

 

Надир-шагьдин алжагъувалари халкьдин фикриъ гъагъи кIваин апIбар гъитну. Табасаран халкьди чапхунч-йириз асас къаршувал улупури хьувализ лигну, къизилбашари, гъагъи женгар гъахури, гизаф гъулар зат имдарди дагъитмиш дапIну, табасаранарин кьадар лап цIиб хьпаз тясир гъапIну. Му женгарин регьбер, дагъустан халкьар гъирагъдилан гъафи душмниз къаршуди сатIи апIури, дирбаш’валиинди жвуван ватан уьбхюри гъахьи халкьдин игит Кьалухъ Мирза Аьндалалин дерейиъ гъахьи  женгариъ гъакIну.

Табасаран райондин администрацияйиъ райондин глава Мягьямед Къурбановдин регьберваликкди фестивалихьна гьязур хьпаз бахш дапIнайи совещаниера кIули гъубшну. Администрацияйин гъуллугъчйирикан, тарихи аьлимарикан, медениятдин ва жямяаьтлугъ вакиларикан ибарат вуйи тешкиллувалин комитет дюзмиш дапIну, серенжемар гъахуз ккайи йишв ва вахт тяйин гъапIну.

Къайд апIуб лазим вуки, «Табасаран медениятдин фестиваль» проект жигьиларин ляхнариз лигру Федералин агентствойин жигьиларин проектарин вари Урусатдин конкурсдин грантдин дахилнаъди уьмриз кечирмиш апIурайиб ву.