Сентябрин 29-пи йигъан Хив райондин культурайинна рягьятвал гъдбгъбан Центриъ табасаран халкьдин шаир, писатель, публицист Гьюсейн Аьбдурягьмановдин 70 йис тамам хьпаз тялукь шадлугъар къайд гъапIну.
Мяракайин иштиракчйир ва дуфнайи хялар къаршуламиш апIури, Хив райондин глава Ярмет Ярметовди, юбиляр му мяракайихъди тебрик ва дугъаз яратмиш апIбан рякъюъ гележегдиъра мюгькам сагъ’вал ккун гъапIну.
Гьюсейн Мягьямедович Аьбдурягьмановдин уьмрин ва яратмишарин рякъкан шадлугънан мяракайиз уч духьнайидариз илмарин лайикьлу гъуллугъчи, профессор Загьир Загьировди маракьлу доклад гъапIну.
– Гьюсейн Аьбдурягьманов узуз лап бицIи вахтналан мина таниш вузуз. Думу гьарсаб вахтна зегьметниин юкIв алир вуйи.
Литературайин цирклиъ дугъу дурумлу шил гъибтра: улупнайи вахтназ шаирин хайлин поэзияйин, прозайин эсерар чапдиан удучIвна. Шаирвалин рякъюъ Аьбдурягьмановди табасаран литературайин машгьур биначйир Абумуслим Жяфаровдин, Манаф Шамхаловдин, гъардшар Митароварин ва жарадарин хатI давам апIура.
Шаирин сифтейин яратмишар райондин милли газатдиъ, кьяляхъна литературайин альманахариъ ва уьмуми сборникариъ чапдиан удучIвну. Хъа дугъан «Тухум», «Чювккер», «Снайпер Аьбдуллагь» китабари табасаран литературайиъ лайикьлу йишв гъибисну.
Аьбдурягьмановдин кьалмиккан, жюрбежюр газатарин редакцйириъ, радиойиъ лихури, варжариинди публицистикайин макьалйир ва жюрбежюр очеркар ккудучIвна. Гъи, 70 йис къайд апIури, юбиляр ихь халкьдин литература артмиш апIбан рякъ давам апIуз гьязур вуйивалиин инанмиш вуза, – гъапну З.Загьировди.
Гьюрматлу Гьюсейн Мягьямедович юбилейихъди тебрик апIури, дугъан терефназ РД-йин халкьдин шаир, РД-йин писателарин Союздин председатель Мягьямед Аьгьмедовди, РД-йин писателарин Союздин табасаран секцияйин кIулиъ айи Сувайнат Кюребеговайи, табасаран халкьдин шаирар Шюшеханум Керимовайи, Кюребег Мурсаловди, Гьяжимягьямад Гьяжиевди ва жарадари хайлин мани гафар гъапну.
Гьюсейн Аьбдурягьмановди табасаран ва вари Дагъустандин литературайин артмиш’валик лайикьлу пай кивбаз лигну, думу Урусатдин писателарин Союздин значок тувбиинди лишанлу гъапIну.
Шадлугънан мяракайиин райондин мектебариъ урхурайидари Гьюсейн Аьбдурягьмановдин яратмишариан саб жерге шиърарра гъурхну.
Мярака культурайин гъуллугъчйирин сягьнийири лапра маракьлу гъапIну.
