Гъи федеральный ва ерли бюджетариз вахтниинди пулин дакьатар гъювал гизафси уьлкейин налогарин управленйириъ ляхин апIурайи пишекрарикан асиллу ву. Налогар вахтниинди тувували гьюкуматди агьалйирин улихь чаина дидиснайи жямяаьтлугъ мажбурнамйир тамам апIувализра аьхю кюмек тувра.

 

Налогар уч апIбан ляхин чпи фици тешкил дапIнаш ва 2020-пи йисандин ва гъябгъюрайи 2021-пи йисандин ляхнин натижйирикан узуз Дагъустандин кьибла терефназди айи вари районар чаз дахил шулайи 4-пи нумрайин налогарин управлениейин начальникдин вазифйир тамам апIурайи Къурбан Рабадановди (шиклиъ) ктибтнийи.

– Ухьуз мялум вуйиганси, 2020-пи йис варидариз читинуб гъабхьну. Коронавирусдин уьзрихъди аьлакьалу вуди инсанарин уьмриъ ва Урусатдин Федерацияйин хайлин идарйириъ дигиш’валар гъахьнийи. Гъубшу йисан урчIвуб вазлин натижйириинди, кьибла Дагъустандин районарин ва Дагъ. Огни шагьрин бюджетар тамам дарапIди гъузну, фицики Президент Владимир Путиндинди, коронавирус уьзрихъди аьлакьалу вуди, инсанариин илирчнайи налогар ис апIуз къарар адабгънийи. Амма, гьаци вушра, налогар уч апIбан ляхин зяиф гъабхьундарич. Дупну ккундуки, РД-йиъ айи РФ-дин МРС-дин ФНС-дин улупбариинди, гьамусяаьт ихь дагълу районариъ дилаварчивалиин машгъул духьнайидар гизаф а, гьацира арендайиз тувнайи жилариланра бюджетдиз хайлин пул гъюра. Вуйиганси дупну ккунду, гьамусяаьт ихь бюджет артухъ апIурайидар дилаварчйир ву.

Хъа читинваларикан гъулхиш, бязи районарин гъуларин поселенйирин кIулиъ айидари чпиз табшурмиш дапIнайи вазифйирин жавабдарвал гьисс дарапIбан дюшюшар гизаф алахьуру. Коронавирус узрихъди аьлакьалу вуди, инсанарихьан пулин дакьатар электрондин жюрейиинди уч апIбан серенжемар кIули гъахру вахтна гъуларин поселенйирин кIулиъ айидаризра ляхин апIуз читинди алабхъуваликан аьгъячуз. Думу хатIалу уьзриан аьзарлу гъахьи налогар уч апIру гъуллугъчйириз ич управлениейин терефнаан хайлин кюмекар тувунча.

Сач налогар уч апIбан ляхнин натижйирикан улхуруш, 2020-пи йисан урчIвуб вазлин арайиъ налогарин 4-пи нумрайин управлениейи тялукь районарин ва Дагъ. Огни шагьрин мяишатарин ва карханйирин гъазанжарилан бюджетдиз гъюрайи налогар уч апIувал кьялан кьадарнаъди тамам гъапIну. Гьадму гьисабнаан Дагъ. Огни шагьриъ 54 386,90 манат, Гъяякент райондиъ – 349 175 манат, Дахадаевский райондиъ – 457 792 манат, Табасаран райондиъ – 581 267 манат уч гъапIну. Хъа 2021-пи йисандин натижйир декабрин вазлиъ йивидихьа, – гъапнийи Къурбан Рабадановди.