Октябрин 2-пи йигъан Избербаш шагьрин культурайин хулаъ Рягьимат Гьяжикеримовайин (ТIагьировайин) «Гъулан гъирагъ» кIуру китабдин презентацияйиз бахш дапIнайи мярака кIули гъубшну. Серенжем ачмиш апIури, му шагьрин культурайин хулан пишекар Издаг Ибрагьимовайи уч духьнайидариз учв Рягьимат Гьяжикеримовайихъди цIиб улихьнаси таниш гъахьиваликан ва серенжем чпин тешкилатдиъ гъабхурайивалиин чпин вари коллектив рази вуйиваликан гъапну.
«Рягьимат Камаловнайи мектебдиъ урхурайи вахтнахъанмина шиърар дикIура, ва дугъан поэзияйихьна вуйи маракьлувал цIиб шуладар. Ухьуз рябкъюрайиганси, шиърарихъ вахт гьапIруси, ихь шаири чан вахт халачийин дуркьарихъра гьапIри гъахьну. Гьаму столариин илирчнайи бицIи халачйир, хьайин атIнар, гапар, жвилли гьибарикан дапIнайи шей’ар, билих, гьякалар Рягьимат бажийин хилари дапIнайидар ву», – гъапну серенжем кIули гъабхурайи шаир, драматург, филологияйин илмарин кандидат Эльмира Аьшурбеговайи.«Рягьимат Камаловнайи мектебдиъ урхурайи вахтнахъанмина шиърар дикIура, ва дугъан поэзияйихьна вуйи маракьлувал цIиб шуладар. Ухьуз рябкъюрайиганси, шиърарихъ вахт гьапIруси, ихь шаири чан вахт халачийин дуркьарихъра гьапIри гъахьну. Гьаму столариин илирчнайи бицIи халачйир, хьайин атIнар, гапар, жвилли гьибарикан дапIнайи шей’ар, билих, гьякалар Рягьимат бажийин хилари дапIнайидар ву», – гъапну серенжем кIули гъабхурайи шаир, драматург, филологияйин илмарин кандидат Эльмира Аьшурбеговайи.
Му мяракайиъ шаирин хизан, багахьлуйир, дугъан мялим, Ляхла гъул’ан вуйи Шамил Мустафаев, Хив райондин культурайин пишекар Сервер Уьмаров, Мягьячгъала шагьриъ яшамиш шулайи, Аь.Аь.Тахо-Годийин ччвурнахъ хъайи педагогикайин институтдин илимдин кIулин пишекар, учвра УртIил гъул’ан вуйи Ширинат Жамалиева, шаир, журналист Шюшеханум Керимова, Рягьимат Гьяжикеримовайихъди Ляхла мектебдиъ сатIиди урхури гъахьидар, му шагьриъ яшамиш шулайи ихь табасаранлуйир иштирак гъахьну.
Шамил Агъабаевичди чан удучIвну улхбаъ бицIи классариъ урхру вахтари Рягьиматдин литературайихьна ва бабан чIалнахьна ади гъабхьи маракьлуваликан гъапну ва шаирин шиирра гъурхну. Му мяракайиъ Ширинат Беглеровнайи, шаирин уьмрикан, чпин багъри гъулкан ктибтури, дидин табиаьтдин ва Рягьиматдин хизандин шиклариканна шиърарикан гьязур дапIнайи презентация кIули гъубхну.
Шюшеханум Мягьямедшерифовнайи чан удучIвну улхбаъ шаирин яратмиш апIбари бицIи яшнан баяр-шубариз табиаьт ахтармиш апIуз кюмек апIурайиваликан ва дидихьна вуйи маракьлувал, ккунишин артухъ хьуз гъитрайиваликан гъапну.
Мяълийирин устадар вуйи Дагъустан Республикайин лайикьлу пишекар Гюльназ Гьяжикъурбановайи ва Фахрудин Гюлечевди гъапIу мяълийири уч духьнайидарин юкIвар артухъдиси рази хьуз гъитнийи.
Рягьимат Гьяжикеримовайи ццийин йисан чан 60 йисандин юбилейра къайд гъапIну. Гьевеслу юкIв айи шаир гъубшу юбилейихъди ва удубчIвнайи цIийи китабдихъди теб-рик апIури, дугъаз жандин сагъ’вал, уж’валар, гележегдиъ хъана аьхю хъуркьувалар ккун апIурхьа!
Шиклиъ: ЦIийи китабдин презентацияйин иштиракчйир.
