Улихьна йигъари Мягьячгъала шагьриъ Б. Мурадовайин ччвурнахъ хъайи Дагъустандин культурайин ва искусствойин колледждин бинайиинди республикайин музыкайин ва искусствйирин мектебариъ урхурайидарин арайиъ халкьдин ва милли музыкайин алатариин уйнамиш апIбаан республикайин конкурс кIули гъубшнийи.

Конкурсдиъ «симар али музыкайин алатар» номинацияйиъ, халкьдин музыкайин жара алатарин оркестр хъипну, чюнгюр йивбаан Табасаран райондин искусствйирин мектебдин вакилари сабпи йишв гъибисну (шиклиъ). Къайд дапIну ккундуки, искусствйирин мектебдин вари тербиячйири Хючнаарин сабпи нумрайин кьялан мектебдиъ урхура. Дурар Асият Исаева (чюнгюр йиврур, 7-пи класс), Бесханум Асланова (далдабу йиврур, 4-пи класс), Карина Рашидова (каманчи йиврур, 4-пи класс), Эмилия Демирова (къуша йиврур, 4-пи класс) ву. Искусствйирин мектебдиъ баяр-шубариз музыкайин дарсар киврайидар Нури Рашидов (Дагъни гъул’ан), Рашид Рашидов (Цалак гъул’ан) ва Рашид Рашидов (ТIаттлан) ву.

Дупну ккундуки, Табасаран райондин искусствйирин мектебдин тербиячйир улихьна вахтарира зонйирин ва республикайин эгьемиятнан конкурсариъ швнуб-сабан пешкешнан йишвариз лайикьлу гъахьну, дурар райондиъ гъахру культурайин серенжемариъра жанлуди иштирак шулу.

Апрелин 15-пи йигъан Хючнаарин сабпи нумрайин кьялан мектебдиъ РД-йин конкурсдиъ гъалиб гъахьидариз гьюрмат апIбан серенжем кIули гъубшну. Душваъ мектебдин дирекцияйин терефнаан баяр-шубариз Гьюрматнан грамотйир тувну.