Мициб аьламат гъябкъюб дарчуз

 

 

Медицинайин пишекрарин гьисабариинди, коронавирусдин уьзриан аьзарлу шулайидарин кьадар йигълан-йигъаз артухъ шула. Хъа аьхиримжи вахтна уьзур лап гъизгъин дубхьнайивали республикайин кIулиъ айидарик гъалабулугъвал кипра, фицики му уьзрин дельта-штаммдин 4-пи лепейи агьалйирин яшайиш гизаф гъагъи апIура.

 

Гъубшу гьяфтайиъ Дербент шагьрин кьялан больницайин кIулин духтрин вазифйир тамам апIурайи Девлетхан Мирзахановдихъди гюрюшмиш гъахьунза. Ич арайиъ гъабхьи сюгьбатнаъ гъи коронавирусдиз аьксиди гъабхурайи женгнакан, вакцинайин рубар йивурайи касарин кьадарнакан ва гьацдар жара месэлйирикан гъулхунча.

– Девлетхан Турабович, интервьюйин эвелиъ COVID -19 уьзрикан вуйи яв фикир ачмиш гъапIнийиш, ккундийзуз.

– Лап чIуру ва гъагъи уьзур ву. Му къурхулу тIягъвнихъди аькси женг гъабхури, варитIан улхьан жергйириъ айидар духтрар ву. Ва духтрари чпихьан удукьру кьадар ляхин гъабхура. Му уьзур хабарсузди ихь арайиз гъафи вахтна, духтрариз дидихъди аькси женг гъабхбан тажруба адайи, гьаддиз аьзарлуйирикан уьзур сарикан тмунурикна тарабгъури, духтрарра аьзарлу гъахьну, гьяйифки, гъийихдарра а. Дагъустандин медицинайин цирклиъ гъагъи пневмонияйиан 30-тIан артухъ гъуллугъчйир кечмиш гъахьну.

Духтрарин арайиъ тешкил апIурайи совещанйириъ гьамусдиз гъапIу ляхнин гьякь-гьисаб тувру вахтна, духтрари, сагъ апIуз фукьан вушра гъагъи уьзрар, аьзарлуйир гъяркъюнчуз, хъа мициб аьламат гьамусдиз гъябкъюб дарчуз кIури, текрар апIура.
Хъа учу му уьзрин гьякьнаан ич духтрарин арайиъ анализ апIбан ляхин гъубхунча, ва гьарсар касди жвув дюрхну ккунивалин натижайихъна гъафунча. Гьелбетда, гизаф инсанар уч духьнайи йишвахьна гъушу вахтна, дурарин арайиъ сар-кьюр вушра коронавирусдиан кетIерццнайи касар ади шулу, ва гьадрарикан уьзур хайлин жара касарикнара тарабгъуру. Жюрбежюр серенжемариъ иштирак шлуган, мисалназ, сумчрариъ ва саламариъ, ихь ватанагьлийири маскйир алахьудар. Натижайиъ дурар аьзарлу шулу.

– Дербент шагьриъ коронавирусдин уьзриз аькси вакцинайин рубар йивбан серенжемар фици кIули гъягъюра? Рубар гъивдарин кьадар фукьан ву?

– Гьамусяаьт Дербент шагьриъ коронавирусдиз аькси вакцинайин рубар гъивдарин кьадар 17218 кас ву. Хъа улихьнаси инсанарин арайиъ коронавирусдиз аькси рубар йивувалин ляхин лап зяифди кIули гъябгъюрайи. Гьаддиз, му уьз-рихъди аьлакьалу аьгьвалат пис шули гъабхьиш, гьюкуматдин идарйириъ лихурайи гъуллугъчйириз рубар йивуб тIалаб гъапIнийи. Му тIалабнан кIуллан саспи идарйириъ улхбарра гъахьну кIури, хабрар айи. Амма кьяляхъна, уьзриан инсанар ктIерццбан гьял лап читин гъабхьиган, мирас-варис кечмиш хьуз хъюгъиган, хайлин касари, жвуван жягьтлувалиинди гъюри, уьзриз аькси вакцинайин рубар йивуз хъюгъну.
ТIягъюн яркьуди тарарабгъбан бадали, РД-йин сагъламвал уьбхбан министерствойи ихь улихь дивнайи вари уьлчмйир кьабул дапIну ккунду. 65 йис ва думутIан артухъ яшар духьнайи, вакцинайин руб гъивдар ктарди, агьалйириз чпи яшамиш шулайи йишвариъ хулариъ гъузбан тIалаб апIурача. Медицинайин пишекрари тасдикь апIурайиганси, корона вирусдин 4-пи лепе лап читинуб ву. Дидкан иллагьки бицIидариз ва бицIир кайи дишагьлийириз гизаф хатIа а.

– Гьамусяаьт Дербентдиъ коронавирусдиан кетIерцц-найи бицIидарин кьадар фукьан ву?

– Ич гьисабариинди, гьамусяаьт шагьриъ коронавирусдиан аьзарлу духьнайи бицIидарин кьадар 26 кас ву. Аьзарлу баяр-шубарин арайиъ йихувалин дюшюшар адар, гьаз гъапиш дурариз лигувалин зиин гюзчивал гъабхурача. БицIир кайи дишагьлийиринра сагъ хьувал рягьятди кIули гъябгъюра. Гьаз гъапиш ич терефнаан дураризра гьаммишан ужуб лигувал ва гъайгъу а.
Больницайин провизорный госпиталиъ ляхин ужуди албагнайич. Дармнарихъди тямин апIувалра ужуб вуйич, пневмония ади аьзарлу духьнайидар сагъ апIуз вари мумкинвалар ишлетмиш апIурача.
Гъийин йигъаз больницайиъ 70 аьзарлу ккаъру йишвар ккабалгнайич, дурарикан 22 – реанимацияйиъ, хъа 64 – кислороддихъди тямин апIбан мумкинвал айидар ву.

– Девлетхан Турабович, Дербентдин кьялан больницайин кIулин духтирди ляхин апIури, шубуб вазкьан вуяв. Кьюб гаф яв гъуллугънакан ва увуз ляхниъ алахьурайи читинваларикан пуб ккун апIураза.

– Узу 2021-пи йисан 1-пи июлихъан мина больницайин кIулин духтрин вазифйир тамам апIураза. Читинвалар дици адарзуз, гьаз гъапиш узу хайлин йисари Дербентдин районарин арайиъ вуйи медицинайин тяди кюмек апIбан станцияин кIулин духтирди ляхин дапIназа, ва пишекарвалин ужуб тажруба азуз. Хъа пуз ккундузузки, медицинайин узу гъилиху идарайин коллектив думукьан аьхюб дайи. Мушван коллектив ва духтрарин кьадар аьхюб ву. Амма цIийи коллективдихъди ляхин апIуз гъулайди вузуз, духтрар йиз гъавриъ ахъру, узу – дурарин. Гьелелиг ляхин ужуди гъябгъюрайич.
Сюгьбатнан аьхириъ ватанагьлирихьна илтIикIну пуз ккундузузки, ухьу варидари сатIиди, сар-сарин гъавриъ ахъну, вакцинайин рубар йивну ккунду. Вакцинайин рубар йивуз хъюгъу вахтнахъанмина коронавирусдиан ктIерццурайи касарин кьадарра цIиб хьуз хъюгъра. Гьаци вушра, ихтиятвал дапIну, гьарсар кас чан сагъламвалин гъайгъушнаъ духьну ккунду.