Мягьячгъала шагьриъ яшамиш шули, Угълангерек Мевлюдовнайин 40 йис шула. Думу Табасаран райондин СиртIич гъул’ан ву. Гьеле мектебдиъ урхури имиди, Угълангерек шиърариин гизаф юкIв алир вуйи. Чан сабпи эсер дугъу 1985-пи йисан гъибикIну.
Дугъак шиърар дикIбахьна, урхбахьна аьшкь СиртIич гъулан мектебдиъ урус чIалнан дарсар киври гъахьи Антонина Григорьевнайи капIнийи. Антонина Григорьевнайи шиир урхбан саягъ, нугъат Угълангерекдиз гизаф кьабулди вуйи. Мялимди хулаз урхуз туву гьарсаб шиир дугъу кIваълан апIури гъахьну. «Классикарин ва ихь машгьур шаирарин эсерар урхруган, яраб гьаму шиир фици арайиз гъюрайкIан кIури, фикир апIури шуйза. Магьа Аллагьу Тяаьлайи йиз кIваъра гьадму гьиссар уягъ хьуз гъитну ва шиърар дикIуз кьувват тувра. Гъи узу йиз мектебдиз, мялимариз, абйир-бабариз, багъри веледариз, худлариз, Меккайин гирами йишвариз бахш дапIнайи ва жара шиърар дидикIназа», – кIура Угълангерек Мевлюдовнайи.
Йиз сюгьбатчи хайлин йисари дерзечиди гъилихну, хъа гъи чан худлариз тербия тувбиин машгъул духьна.
«Улихьна йисан веледари узуз аьхю гьяждиз гъягъюз билет багъиш гъапIнийи. Гьякьлуди гъапиш, йиз кIваъ гьаммишан дина гъягъбакан марцци фикрар ади гъахьнийи. Жвуван веледарин пешкеш лап багьалу, йиз мурад-метлебар тамам апIурайи, женнетдиз вуйи рякъюз туврайи билетси кьабул гъапIнийза. Ва гьадму гирами йишвариан гъафири швнуб-саб шиир гъидикIнийза», – ктибтура Угълангерек Мевлюдовнайи.
Угълангерек Мевлюдовнайиз чан шиърар гьелелиг наанкIа чап апIуз мумкинвал гъабхьундар. Амма дугъу гьарсаб цIийи шиир багахьлуйириз, бицIидариз урхури шулу.
Гъи дугъан саб шиърихъди таниш хьуз газат урхурайидаризра мумкинвал туврача.
Аьхиратдиъ тувдихьуз «сес»
Ургуд жилар айиб ву,
Ургуд завар айиб ву.
Аьхиратдиъ дюн’яйин
Жавабдарра айиб ву.
«ГъипIу уьл ву», – макIанай.
«Гъубшу йигъ ву», – макIанай.
Девлет-хазна а кIури,
Дид’инра шад махьанай.
Герек хьибдар ичв девлет,
Кюмек шулдар думу, гьелбет,
Аьхиратдин берекет
Му дюн’яйиъ ккебгъруб ву.
Касибриз кюмек тувну,
Йитимариз уж’вал гъапIнуш,
«Невснан кьадар» фу гъахьнуш,
Аьхиратдиъ гьерхру, кIур.
Му дюн’яйиъ уж’вал дархьиш,
Валлагь, пашман махьанай, гьа.
Му дюн’яйиъ ккунир дархьиш,
Валлагь, гиран мапIанай, гьа.
Му дюн’яйиъ «хялар» вухьа,
Му дюн’яйин «эйсйир» дархьа.
Дюн’яйиъ хътабгъу «нефесну»
Аьхиратдиъ тувдихьуз «сес».
