Мамедгъала поселокдихъди таниш шулайи вахтна, ду- шваъ айи гизаф мертебйирин хулар фициб гьялнаъ аш аьгъю апIуз ккун гъабхьунзуз ва УК «Хал-йишванна коммунал гъуллугъарин управление» кIуру тешкилатдин идара апIурайи Ихтиандр Иминовдихъди гюрюшмиш гъахьнийза.
Ихтиандр Иминовди къайд гъапIганси, поселокдиъ гизаф мертебйирин 28 хулар а. Дурарикан 9 хал хьуб мертебайин, 2 хал – шубуб мертебайин, имбу хулар – 2 мертебайиндар ву. Дурар вари Советарин вахтари дивнайидар ву. Гьамусяаьт вари хулариъ расвалин мюгькам ляхнар кIули духна, электрикдин токдиинди вуйи хусуси мани апIувал ккабалгна.
«Учу расвалин ляхнар кIули гъахруган, гандриж йивнайи турбйир ккадагъну, пластикдиндар ккивунча. Сантехникдихъдира йикьрар йитIурача. Шидра гьар вахтна хулариъ а. Му хулариъ яшамиш шулайидариз бинайиан расвалин ляхнар гъахувалихъан пул тувуз ккундар. Гизафдарин буржар духьна. Бурж ктрур сар урус миллетдин дишагьли ву.
Комарова кючейин 14-пи хулаз агьалйири «5 мертебайин чIуру хал» кIура. Му хулаъ квартирйир улихьна йисари совхоздин директор вуди гъахьи Нариман Аьлиевди кутанарин рабочйириз тувнийи. Дурар, уву фу гъапIишра, чпи гъубгу газдин, токдин ва жарабдин пул тувну ккунивалин гъавриъ шуладар. Думу хулаъ яшамиш шулайидарикан гизафдарик 3-4 йисандин буржар ка»,
– кIура Ихтиандр Иминовди.
Дугъан гафариинди, вари Урусатдиъ кIули гъябгъюрайи «Гъулай аьгьвалат» кIуру проектдихъди ляхин гъабхури, Мамедгъала поселокдиъра Нариман Аьлиевдин ччвурнахъ хъайи кючейиъ айи 26-пи, 28-пи, 30-пи, 32-пи нумрайин гизаф мертебйирин хуларин гьяятар рас дапIну, аквар гъизигну, плитка ккивну. Гьацира гьарарра кивну, зирзибил абхьру ишкIар дивну, мархь гъубгъган шид гъябгъру архра гъапIну.
«Мялимар ва бюджетдин жара пишекрар кIули духнайи му ляхнариин разиди ву. Дурари «чухсагъул» кIура. Имбудариз сабдиканра фикир ктар. Субботникар тешкил гъапIну кIури, гъюрударра шулдар. Урус миллетдин вакилари кюкйир киври, хуларихъ хъайи аьтрафар марцц апIури шулу»,
– давам гъапIну И.Иминовди.
Управлениейин кIулиъ айири гъапиганси, поселокдин глава Исрапил Маллаевдира му цирклиъ алахьурайи читин месэлйир гьял апIуз кюмек апIура. Му хулариъ йисариинди фужкIа яшамиш даршулайи квартирйирра гизаф а. Поселокдиъ ляхин адрувализ лигну, гизаф касар чпин хизанарра хъади удучIвну гъягъюра. Гъузнайидаризра ляхин адар. Ихтиандр Иминовдин гафариинди, инсанар касибди яшамиш шула. Ляхин айиш, дурарин яшайиш ужуб шуйи.
Ич сюгьбатнаъ Ихтиандр Иминовди швнуб-сабан урус миллетдин вакилар ужуб терефнахъанди кIваин гъапIнийи. Дурари вахтниинди пул тувра, субботникариз удучIвура, кюкйир кивра. Узуз айи квартирара 3 мертебайин хулариъ айиб ву. Гьар вахтна гъуншйирихъди сабхилди хуларин аьтрафар марцц апIури, техничка адру вахтари нубатнахъди подъездра марцц апIури шуйча. Урусатдин жара йишвариъ кюкйир кивну адру гьяятар, хуларин улихь йишвар шулдар. Ихь дишагьлийириз чпин хуларин улихь кюкйир кади, хуларин айитIси марццишин уьбхюз гьаз ккундарш, узу гъавриъ адарза.
