Улихьна йигъари «Табасарандин нурар» газатдин журналистар Каспийск шагьрин 9-пи нумрайин мектебдиз хяларди гъушну. Дина гъягъбан себеб –мартдиъ ич редакцияйи тешкил гъапIу «Йиз дада дюн’яйиъ варитIан ужур ву» конкурсдиъ иштирак гъахьи бицIидариз гьюрматнан грамотйир тувуб вуйи.
Учу мектебдиз хъуркьруган, ихь хайлин шаирарин суратар, табасаран чIалнахъди, литературайихъди аьлакьалу жюрбежюр плакатар керхну албагнайи табасаран чIалнан кабинетдиъ бабан чIал киврайи мялим Гюльзаман Рягьимовайи конкурсдиъ иштирак гъахьи вари бицIидар гюрюшдихьна гьязурди дапIнайи.
Грамотйир тувбахъди аьлакьалу вуди тешкил дапIнайи серенжемдиз мектебдин директор Сергей Рагьимович Гьяжиев кIулиъ ади завучарра ва имбуну милли чIаларин мялимарра дуфнайи.
«Табасарандин нурар» газатдин кIулин редактор Гюлягьмад Маллялиевди чан улхбаъ къайд гъапIганси, редакцияйиъ тешкил гъапIу конкурсдиъ асас вуди иштирак гъахьи бицIидар гьаму мектебдиъ урхурайидар ву.
«Шагьриъ айи мектеб вушра, ичв бицIидар учу тешкил гъапIу конкурсдиъ лап аьшкьниинди иштирак гъахьну. Йиз фикриан, му мялимдин ва гьацира мектебдин руководствойин аьхю хъуркьувал ву. Гъит гьамусдихъантинара ичв мектебдиъ урхурайидар гьамциб аьшкьниинди мили чIалариз бахш вуйи серенжемариъ иштирак ишри», – гъапнийи газатдин редактори.
Чан нубатнаъ Сергей Гьяжиевди конкурс тешкил апIбаз газатдин коллективдиз ва урхурайидариз конкурсдиъ иштираквал апIуз кюмек туву Гюльзаман Рягьимовайиз чухсагъул мялум гъапIнийи. Дугъу гъапиганси, му кьадар грамотйир сабишв’инди, гьелелиг, мектебди гъазанмиш дапIнадайи: «Му ич мектебдин лап аьхю хъуркьувал ву. Фицики шагьриъ яшамиш шулайи бицIидари бабан чIалнаан вуйи конкурсдиъ мици жанлуди иштирак хьувалиинди, дидланра савайи, пешкешнан йишвар гъазанмиш апIувалиинди ич мектебдихьан дамагъ апIуз шулу».
Серенжемдиз уч духьнайи имбуну дагъустан чIаларин мялимарира Гюльзаман Рягьимовайикан ужувлан гафар гъапнийи.
Лак чIал киврайи Наина Хучуевайи мялум гъапIганси, Гюльзаман Шябановнайихъди сатIиди му мектебдиъ ляхин апIури 2 йистIан даршра, дугъаз чан ярашугъ гизаф хуш ву, фицики Гюльзаман мялимсира, инсансира фуну вахтна вушра кюмекназ гъюру кас ву.
Гюльзаман Рягьимовайин хъуркьуваларикан улхури, Хучуевайи учуз, сач бабан чIалариан шагьрин дережайиъ кIулиъ гъубшу олимпиадайиъ варитIан гизаф гъалибнан йишвар табасаран чIалнаан гъадагъуваликан хабар тувнийи. Олимпиадайиъси, имбуну жара серенжемариъра Гюльзаман Шябановнайин ученикар гизаф аьшкьниинди иштирак шула.
Газатдин редакцияйин терефнаан учура Гюльзаман Рягьимовайиз ва дугъу тербия туврайи ихь бицIи ватанагьлийириз артухъ хъуркьувалар ккун апIурача.
