Мялум вуйиганси, 1998-пи йисан 28-пи мартдиъ 53-ФЗ нумрайиккди адабгъу «Эскервалин вазифайин ва военный гъуллугънан гьякьнаан» Федералин Къанундиз асас вуди, 18-27 йисан яшнаъ айи ва запасдиъ адру, военный гъуллугъназ дих дапIну ккуни ватандашариз сабпи апрелиан мина военный гъуллугъназ дих апIбан кампания кIули гъябгъюра.
Думу кампания 15-пи июлизкьан давам хьибди. Гьаму йисан ихь республикайиан военный гъуллугъназ шубуд агъзур жигьилиз дих апIбанди ву. 2019-пи йисан Дагъустандиз вуйи квота кьюб ражари за дапIна. Ццийин хьадукран призывдиъ Табасаран райондиан военный гъуллугъназ 75 жигьилиз дих апIбанди ву. Ккудубшу йисан чвлин призывдин вахтна 41 жигьилиз дих гъапIнийи.
Райондин военный комиссар Садикь Мурадялиевди ич гюрюшдиъ гъапиганси, райвоенкоматдиъ шубуд агъзуртIан артухъ призывникар гьисабназ гъадагъна. Ватандашариз военный гъуллугъназ дих апIбахъди аьлакьалу гьязурлугъ’валин ляхнар вахтниинди кIули гъухну. Къанундиз асас вуди, сабпи нубатнаъ военный гъуллугъназ аьхю яшнан жигьилариз, армияйиъ лазим вуйи пишйир кайидариз, заан ва кьялан пишекарвалин образование айидариз дих апIиди. Дугъу гьацира къайд гъапIганси, къанундиз асас вуди, заан ва кьялан пишекарвалин образование айи призывникарихьан чпин хушниинди конт-рактдиинди гъуллугъназ гъягъюз шулу. Думу терефнаан ляхин ярхи йисди кIули гъябгъюра. Контрактдиинди райондиан Урусатдин Яракьлу Кьувватариъ гизаф жигьилари гъуллугъ апIура.
Дупну ккундуки, райондин военный комиссариатди гьар йисан кьялан ва заан военный урхбан идарйириз урхуз гъягъюз кандидатар гъядягъбан зиинра ляхин гъабхура. Гьаму йисан 70 кандидат гьязур дапIна.
Армияйиз дих апIбахъди аьлакьалу месэлйирикан улхури, Садикь Мурадялиевди давам гъапIнийи: «Гьарсар призывник чан яш 27 йис тамам хьайизкьан, райвоенкоматди мялум гъапIу вахтна, йисан кьюб ражари призывдин комиссияйиз гъюз буржлу ву. Гизафдари, институтдик урхуз кIучIвнуш, армияйиз дих апIбан вахт кьяляхъ апIуру, яна отсрочка тувру кIури, фикир апIури шулу. Амма думу дици дар. Заан урхбан идар-йириъ урхурайидарра призывдин комиссияйиз дуфну ккунду, хъа отсрочка шлиз тувруш, призывдин комиссияйи гьял апIуру».
Призывникарин фикир сабсана месэлайиина жалб апIуз ккундузуз, – давам гъапIнийи Садикь Мурадялиевди, – мялум вуйиганси, гизаф призывникар урхуз, лихуз гъягъюру ва райондин гъирагъариъ шулу. Гизаф дюшюшариъ дурариз вахтниинди призывдин комиссияйиз гъюбан гьякьнаан мялуматар тувуз читинди алабхъуру. Гьаддиз гьарсар призывникди, прописка дапIнайи йишв’ан шубуб вазлиз ва артухъ вахтназ жара йишваз гъягъюруш, гьадму гъушу ва яшамиш шулайи йишваъ учв военный гьисабназ гъадагъуз гъитну ккунду. Къанундин му тIалаб тамам апIуз гьарсар кас бужлу ву».
Ццийин хьадукран призывдиъ сабпи ражну вуди райондиан республикайин призывдин пунктдиз 13-пи апрелиъ сабпи десте гьаъну. Военный билетар тувбан кьяляхъ, призывникарин улихь, насигьятнан гафар кIури, райвоенкоматдин гъуллугъч-йир, райондин жямяаьтлугъ, гьадму гьисабнаан жигьиларин тешкилатарин вакилар, удучIвну гъулхну ва дурариз ягъурлу рякъ ккун гъапIну.
Ватан уьбхювал – ихь уьлкейин гьарсар ватандашдин гирами буржи вуйихь. Хъа ихь дагълу уьлке, гьадму гьисабнаан Табасаран, дегьзаманйирихъан мина чан ватанагьлйирин гьунарариинди адлу вуйихь. Ихь призывникариз ватан уьбхбан гъуллугънаъ сагъ’вал, хъуркьувалар ккун апIурхьа, командирарихьан дурарин абйир-бабариз анжагъ чухсагъул мялум апIбан кагъзар гъюри ишри.
Шиклиъ: Табасаран райондин военкоматдин гъвалахъ призывникар рякъюъ тIаайиз улихьна.
