Гьаму йигъари Хив райондин глава Ярмет Ярметов райондин ЦРБ-йин коллективдихъди гюрюшмиш гъахьну. Райондин администрацияйин пресс-гъуллугънан вакили газатдиз туву мялуматариинди, гюрюшдиъ асас вуди райондин сагъламвал уьбхбан гъурулушдин улихь дийигънайи учIру месэлйириз гъилигнийи, гьадму гьисабнаан «Земский доктор» программа уьмриз кечирмиш апIури, ЦРБ кадрйирихъди тямин апIбан месэлайиканра гъулхнийи.

 

«Му проект уьмриз кечирмиш апIури, гьарсар духтриз 1 миллион манат жара дапIну, ихь гъулар ва районар медицинайин кадрйирихъди тямин апIуз мумкинвал шула. Му пул гъадабгъбан асас шартI гьаддиъ аки, фунур-вушра духтир чав ктабгъу гъулаъ 5 йисан медицинайин идарайиъ дилихну ккунду. Дагъустандиъ «Земский доктор» программа уьмриз кечирмиш апIуз хъюгъхъан мина республикайин хайлин больницйириъ, гьадму гьисабнаан Хив райондинра, кадрйирихъди тяминвали месэла саб тягьяр къайдайиз гъафну.

Му ляхин дебккну ккундар. Жигьил духтрар дагълу гъулариз жалб апIбан ляхин мянфяаьтлуди гъабхурхьа»,-  къайд гъапIну Ярмет Ярметовди.

ЦРБ-йин кIулин духтир Жамиля Важибовайи мялум гъапIганси, гъябгъюрайи йисан эвелариан мина «Земский доктор» программайин дахилнаъди Хив райондин ЦРБ-йиз 5 духтир кьабул гъапIну. Му ляхин гележегдиъра давам хьибди.