17-пи апрелиъ Хючнаъ Табасаран райондин ТОКС-дин 6-пи слет гъабхьну, ва дидин дахилнаъди райцентриъ айи Гъалибвалин паркдиъ Ватандин Аьхю дявдиъ гъийихдарин гьюрматназ ядигарвалин Вахта ачмиш гъапIну. Ватандин Аьхю дявдин 74 йис хьпан гъаншариъ кIули гъуху думу серенжемариъ райондин мектебариъ урхурайидарикан вуйи ТОКС-дин дестйир, райондин администрацияйин, РД-йин Табасаран райондиъ айи военкоматдин, райондин жигьиларин тешкилатарин вакилар иштирак гъахьну.
Ядигарвалин Вахта ачмиш апIбан серенжем Гъалибвалин паркдиъ Ватандин Аьхю дявдиъ гъийихдарин гьюрматназ дивнайи гюмбетдихъ кюкйир дивбиинди башламиш гъапIнийи. Хъасин серенжем райондин гизаф гъуллугъар гьуркIру жигьиларин Центриъ давам гъапIнийи.
Уч духьнайидарин улихь удучIвну улхури, ТОКС-дин штабдин начальник Аьбдусалам Аьгьмедовди улихьна йигъари бедбахтвалин дюшюшдиъ ТОКС-дин командир Аьлимягьямед Уьсманов кечмиш хьпан пашман хабар тувнийи. Уч духьнайидари саб дакьикьайиъ ккебехъну дийигъувалиинди Аь.Уьсмановдин яс гъюбхнийи. Хъасин Аьбдусалам Аслановди ТОКС-дин иштиракчйири йисандин арайиъ гъапIу ляхникан ктибтнийи. Дугъу къайд гъапIганси, райондин ТОКС-дин дестейин ад вари республикайиъ тарабгъна, гьаз гъапиш диди 2013-пи йислан мина чпикан хабар амдарди гъудургу 70-рихьна эскер наан гъийихнуш ва кивнуш, аьгъю гъапIну. Табасаран райондин ТОКС-дин вакиларин дестейиз гьамус 1000-тIан артухъ урхурайидар дахил шула.
«ТОКС-дин ляхин чакан хабар амдарди гъудургу аьхиримжи эскрин кьисмат аьгъю гъапIиган ккудубкIуру», – гъапнийи Аьбдусалам Аьгьмадовди.
Серенжемдиъ райондин администрацияйин главайин заместитель Заур Шукуров, Хючна гъулан глава Аьбдуселим Гираев, Табасаран райондин дишагьлийирин союздин председатель Айханум Рашидова, райондин образованиейин управлениейин вакил Ольга Красноженова удучIвну гъулхнийи. Дурари ТОКС-дин вакиларин ляхнин важиблуваликан ва ТОКС-дин вакилариз хъуркьувалар ккун гъапIнийи.
Серенжемдиъ ТОКС-дин вакилари гьязур дапIнайи ва ВОВ-дин йисарин читинваларикан ктибтурайи эсерар гъурхнийи, жюрбежюр сягьнйир ва музыкайин номерар улупнийи, Ватандин Аьхю дявдин бязи иштиракчйирикан ктибтнийи.
Ядигарвалин Вахта 9-пи майдиз давам хьибди.
