17-пи ноябриъ Табасаран райондин культурайин хулаъ Гьюкуматдин табасаран драмайин театри «Сумчрин гъалабулугъ» спектакль улупну. А.Чеховдин «Ккуниваликан хабар тувуб» ва В. Соллогубдин «Назук юкIвкан бала» эсерар сатIи дапIну, дибикIнайи пьесайин бинайиин дивнайи спектаклин режиссёр-постановщик — Калмыкия Республикайин халкьдин артист Сергей Бурлаченко, хъа художник-постановщик — Елена Варова (Калмыкия) ву.
«Сумчрин гъалабулугъ» спектаклин мянайихъди газат урхурайидар жи-къиди таниш апIидиза.
«Му вари аьлхъбануб хьибдийи, эгер мукьан пашманвал ктайиш», – писатель, публицист ва драматург, гъийин йигъазкьан вари дюн’яйиъ машгьур вуйи ва ккуни Антон Чеховдин эсериз гьамциб жикъи кьимат тувуз шулу. В. Соллогубдин «Назук юкIвкан бала» кIуру пьесайикан улхуруш, дидиъ инсандиз гьарвахтна хас вуйи уткан дишагьлийихьна ва пулихьна вуйи ккуниваликан, жилиринна хпирин, дадайинна шуран, абайинна балин арайиъ айи рафтарикан ктибтура. Мурар уьмрин гьаргандиз вуйи мяналу ва метлеблу месэлйир ву. Автори гагь думу рафтар гъизгъин апIура, гагьсан инсанарин хасиятарин ужуз лишнариин аьлхъюра. Аьхириъ, литературайин эсерариъ аьдат вуйиганси, дугъри вуйир, дюзвалин тереф бисурайир гъалиб шула.
В. Соллогубдин эсериъ улупнайиганси, варибдихъди тямин дапIнайи, жарарин девлетниин хаин шулайи дадйирин баяр, дишагьлийир гъийин йигъанра алахьура. Инсандин адмивализ, хулан аьгьвалатназ дилиграйи касарра цIиб адар. Саб гафниинди, пьесайиъ гьамусдин вахтназра хас вуйи ихь уьмрин нукьсанвалар: гъалмагълариъ учIвувал, кьискьисвал, аьмалдарвал, ягьсузвал танкьид, тамашачйириз дюзвалихьна, кIван ачухъвалихьна, инсанвалихьна дих апIура.
Кьюр машгьур автори чпин эсерариъ атIагнайи фикрар, хиялар, тамашичйирихьди утканди, хъугъруганси гьисс апIуз гъитувалиъ, гьелбетки, актерарин уйнамиш апIурайи роль аьхюб ву. Му вазифа заан хъуркьувалиинди кIулиз адабгъдар Дагъустан Республикайин лайикьлу артистар вуйи Гюльнисе Агъаева, Сабир Мевлютов, Аьгьмед ТIаибов ву. Спектаклиъ гьацира Загьир Сагитов, Гюльнара Аьгьметханова, Къистамал Агъамягьямедова, Маркизат Гьяжиуьсманова, Динара Гьясанова иштирак гъахьнийи.
Спектакль Хючнаарин сабпи нумрайин лицейдиъ, гимназияйиъ ва кьюбпи нумрайин мектебдиъ урхура-йидариз улупну. Жигьил тамашичйириз табасаран театрин актерари аьхю устадвалиинди уйнамиш гъапIу спектакль лап кьабул гъабхьнийи, ва чпин гьиссар дурари гурлу гарччлариинди ачухъ гъапIнийи.
