Газатдин гьюрматлу дустар!

 

Магьа 2021-пи йисра тарихназ гъябгъюра. Аьдат вуйиганси, ЦIийи йис улубкьайиз имбу йигъари, ухьу натижйир йивури, гележегдиз планар йитIури шулхьа. Гъябгъюрайи йис ихь газатдиз хъана заан хъуркьувалар гъадагъуз гьевес капIру дирбаш инсанарихъди, ужудар пишекрарихъди, республикайин жюрбежюр мялуматарихъди абцIнайиб гъабхьну.
«Табасарандин нурар» газат гьар йисан жюрбежюр конкурсариъ, проектариъ, конференцйириъ, форумариъ иштирак шула. Гьаму йисра газатдиз бегьерлуб гъабхьнийи. Газатдин шубур журналист – Зубайдат Шябанова, Сефижат Кьасумова ва Марина Рамазанова – республикайин министерствйири кIули гъахурайи конкурсариъ иштирак гъахьну, дурари пешкешнан йишвар гъадагъну.
Гъюру йис ихь газатдин юбилейин йис ву – табасаран чIалниинди сабпи газат чапдиан удубчIвну, 90 йис тамам шула. Улубкьурайи йисан газатдин гъуллугъчйирин улихь хъана аьхю месэлйир дийигъна, дурар гьял апIбан бадали, ичв ва ич кьувватар сатIи дапIну, газатдин ляхин хъана ужу апIбиин зегьмет зигидихьа, ичв иштирак’валик умуд киврача.
Гьюрматлу дустар! Гъит улубкьурайи ЦIийи йис гьарсар касдиз гъубшу йистIан ужуб ибшри. Ичв кIваъ айи ужудар хиялар, фикрар тамам апIуз Аллагь кюмек ишричвуз, хизандиан ислягьвал, девлет ва берекет кам дарибшрийичв!

«Табасарандин нурар» газатдин
редакцияйин коллектив.