Шюшеханум Керимова
ЖИН ШУЛА
Жин шули а аьхълушнахьан
Вари чIивиб чпин мукьариъ…
Рякъюр нивкIар хьадукракан,
Швеъдизра чан мугъарайиъ.
ГъютIрахьимра нивкIуз гъябгъюр,
Ранг гьюдюхну, лизи шул гъюр.
Ихь вазифара ву аьхюб –
Аьхъю вахтна ничхрар уьрхюб.
Ккабхьри дяхин, ккабхьри удар,
Хьадукар гъибган, ихь улдакк,
Ерхьну ккундуш шаду мукьмар,
Духьну ккундуш цIийи мукьар…
Гюлбика Уьмарова
КIУБАН РИШ
Рахурайи гъюбарси,
Дахьра гугар ражниин.
БицIи уткан хядарси,
Рякъюру дурар душв’ин.
Гугар китIри Селминаз,
Деъну шулу, кади наз.
Халачи убхуб шураз
Ккуниб ву, аьгъдар вуш гьаз.
Урцудар шуран хилар,
Фукьан китIрушра гугар.
Рягъяр, тIибчар ва гаркIлар,
Ву дугъан ккуни дустар.
Адугъай-дугъай!
¤ Увуз тувнайиб ву,
Амма жара инсанари ишлетмиш апIуру.
¤ Жилилан рягьятди за апIуз шулу,
Амма ярхлаз гатIабхьуз шулдар.
¤ Ургур чве ву,
Яш сабсиб ву,
Хъа ччвурар жа-жарадар.
¤ ТIибхуру, жакьв дар,
Аьв зигуру, нахшир дар.
¤ Ккундуш гакIвлинуб,
Ккундуш рукьануб,
Бязи гъатар парчдиндар,
Хъа юкIвра вуйиз йиккунуб.
¤ Мужри кка, кьабижви дар,
КIарчар ал, йиц дар,
Ккудубзуру, хюни дар.
¤ Гергмиб ву, ваз дар,
Гъатхуб ву, ччим дар,
Меълиб ву, шекер дар,
Рижв хъа, кьюл дар.
¤ ТIубччвуз даршлу рукьан гьалав,
Дюбхюз даршлу жвилли кIикIил.
¤ Риш – хулаъ, кушар – чIат.
¤ Гьаммишан ушвниъ айиб,
Амма хътIюбкьюз даршлуб.
Абйирин мисаларин мяна ачухъ апIин
* Абайиз гьюрмат дарапIу бализ чан балира дарапIур.
* ИпIбаъ – улихь, ляхниъ кьяляхъ махьан.
* Уж’вализ кьимат тувру, писвализ – нянат.
* Кьадар дарапIиш, гьюлиъ шидкьан гъудрубзур.
* Албагу илхийиз жанаврихьан гучI даршул.
* НивкI хъайириз ахин герек дар, гашди айириз – гъафун.
* Дюн’я гъилицуриз аьгъю шул, илим – гъурхуриз.
Рамкайиъ айи шиклариз ва цифрйириз фикир тувну, мисал гьял апIин (шикл 1)
Кьюлаз нисухьна гъябгъюз кюмек апIин (шикил 2)
Газатдин 1-пи нумрайиъ тувнайи кроссворддин жавабар
Дишди: 1. Агъсакъал. 3. Зигар. 5. Бикар. 7. Сюгьюрлу. 8. Бичинчи. 10. Мурад. 11. Ишара. 12. Аржан. 14. Сагьиб. 16. Утанмаз. 18. Мусибат. 20. Икрам. 21. Рябат. 22. Улубкъуб.
Узди: 1. Азгар. 2. Лакач. 3. Зигьим. 4. Раунд. 5. Бабли. 6. Ранда. 7. Савадлу. 9. Иставут. 12. Абади. 13. Низам. 14. Самур. 15. Бабат. 17. Мургу. 19. Сабаб.
