Дагъустандиъ вакцинация апIбан гьякьнаан кучIлин сертификат гъадабгъувалихъди аьлакьалу вуди уголовный дело гъитIибккну.
Республикайин УФСБ-йин материалариинди, РД-йиъ айи СКР-ин силис гъабхру управлениейи коронавирусдиз аькси вакцинация апIбан гьякьнаан кучIлин мялуматар тувбахъди аьлакьалу вуди уголовный дело ляхин гъитIибккну.
2021-пи йисан майдин вазлиъ Гъяякент райондин больницайин гъуллугъчийи, ерли агьалийин тIалабниинди, сагъламвал уьбхбан цирклин гьюкуматдин саб вуйи гъурулушдиъ, думу касди кьюб пайнакан ибарат вуйи, коронавирусдиз аькси руб гъивну кIури, кучIлин мялуматар тIаъну.
Натижайиъ, къанун чIур апIувалихъди сабси, больницайин гъуллугъчийи жара агьалйирин сагъламвализра хатIалувал хьуз гъитну.
Му дюшюшдин гьякьнаан ахтармишар гъахувал давам шула.
Дагъустандин полицейскйири йирси сундхиан аьхю кьадар пул икI апIувал ашкар гъапIну.
Дагъустандин МВД-йин пресс-гъуллугъну туву мялуматариинди, Акъуша райондин агьали, сундхиан саб миллиондихьна икI гъапIниз кIури, аьрза хьади полицияйиз илтIикIну.
Аьрзачийин гафариинди, цIийи йисан 3-10-пи январиъ учв хулаъ адру вахтна мялум дару касди 968 агъзур манат икI гъапIну. Хулаъ анжагъ дугъан дада ва кюмек апIуз дуфнайи багахьлутIан ади гъахьундар.
Полицейскйири гъуху ахтармишарин натижайиъ тIафал фуж вуш дишлади тяйин гъапIну. Думу хулаз дуфнайи, 32 йисаъ айи багахьлу дишагьли вуди гъахьну.
Хулаъ, яшлу дадайилан гъайри, фужкIа адарди гъахьи вахтна, дугъу, кюмек апIуз дуфнайир вуза кIури, чан чIуру кьаст кIулиз адабгъну.
Му дюшюшдин гьякьнаан, РФ-дин УК-йин 158-пи маддайин 3-пи пайназ асас вуди, уголовный дело гъитIибккну.
Муганайиз Акъуша райондин пенсйирин фонднан кIулиъ ади гъахьир тахсиркарвал апIбан шакнакк ккахъну.
Гъуллугънан ихтиярар чан хайир-наз ишлетмиш апIувализ лигну, Акъуша райондин пенсйирин фонднан муганайиз кIулиъ ади гъахьирин гьякьнаан силисчйири уголовный дело гъитIибккна.
2017-пи йисан августдин вазлиъ дугъу, ерли агьалийихьан 75 агъзур манат руш’ват гъадабгъну, шубуд йис ккимиди пенсия тяйин апIбан гьякьнаан мялуматар базайиъ тIаъну.
Му тахсиркарвалин ляхнин гьякьнаан аьлава мялуматар уч апIувал давам шула.
Учв ляхниан адаъну кIури, тукандик цIа кипну.
10-пи январиъ Хасавюрт шагьрин 24 йисаъ айи агьалийи, учв ляхниан адаъну кIури, дуланажагъдин техника айи тукандик цIа кипну. Тукан Хасавюрт райондиъ дуланмиш шулайи, 68 йисаъ айи дишагьлийинуб вуди гъабхьну. Эйсийиз 2 миллион манатдин зарар гъабхьну.
Ахтармишар гъахбан натижайиъ, къанун уьбхру органарин гъуллугъчйири ашкар гъапIганси, тахсиркарвал гъапIур улихьган му тукандиъ ляхин апIури гъахьи кас вуди гъахьну. Дугъу тахсиркарвал чан кIул’ина гъадабгъну.
