2021-пи йисан 16-пи ноябриъ РФ-дин Госдумайин депутатарин улихьна гьял апIбан бадали адабгъу публичный гьюкмин гьякьнаан вуйи цIийи къанундихъди аьлакьалу вуди, Дагъустандиъ 700-диинакьан гъуларин администрацйир хъяркьюз мумкин ву.
Гъийин йигъаз ихь респуб-ликайиъ айи муниципалитетарин кьадар гьисабназ гъадабгъган, диди уьлкейиъ шубубпи йишв дибисна. Дагъустандин 10 шагьур ва 42 район гьисабназ гъадагъиган, мушваъ 750-ртIан артухъ муниципалитетари ляхин апIура. «Публичный гьюкмин саб вуйи гъурулушдиъ ерли самоуправлениейин уьмуми усуларин гьякьнаан» къанундиъ гъуларин поселенйириъ ерли гьюкум кьатI апIувал улупна. Проектдиз асас вуди, муниципалин образованйирин шубуб жюре гъузра: шагьрин ва муниципалин округ, шагьрин айитI айи аьтраф.
Эгер думу къанун кьабул гъапIиш, ухьу Дагъустандиъ айи варжариинди гъуларин администрацйирихьанси, респуб-ликайин меркездин айитI айи шубуб райондихьанра хьиди, фицики Мягьячгъала федеральный мяна айи шагьур дар.
Жюрбежюр экспертарин фикриинди, думу къанунди гизаф терефар гьисабназ гъадагънадар. Эгер гъуларин администрацйир хъяркьиш, агьалйир, справка гъадабгъбан бадали, райондиз ясана шагьриз душну ккунду. Саб терефнахъан ухьу гъулан мяишатар цIийи алаъбакан улхури, гъулариз рякъяр апIури, мектебар диври, хъа тмунуб терефнахъан гъулар ккидирчуз кюмек апIури хай шулинхъа?!
Январин 11-пи йигъан кIули гъубшу Дагъустан Республикайин Халкьдин Собраниейин Президиумди гьаму йисан гъабхру РД-йин Халкьдин Собраниейин сабпи сессияйиъ гьял апIуз адагъру месэлйир тасдикь гъапIну. Сессия январин 18-пи йигъан сяаьт 10:00 ккебгъди. Сессияйиъ депутатари, къанундин жара проектарихъди сабси, «Публичный гьюкмин саб вуйи гъурулушдиъ ерли самоуправлениейин уьмуми усуларин гьякьнаан» федеральный къанундин проект кьяляхъ апIбан месэлара гьял апIбанди ву.
Гьацира РД-йин Халкьдин Собраниейин председатель Заур Аскендеровди, коронавирус жямяаьтлугъдиз хатIалу уьзур вуди гъубзрайиваликан кIваин дапIну, депутатарикан чпин сечкичйирин арайиъ вакцинайин рубар йивувал чарасуз лазим вуйивалин гьякьнаан гъаврикк ккаъбан ляхин гъабхувал ккун гъапIну. Дугъу гьацира Халкьдин Собраниейин экономикайин политикайин, инвестицйирин ва предпринимателвалин комитетдин председатель Сефер Аьлиевдиз бизнес-тешкилатарихъди вакцинацияйин гьякьнаан ляхин гъабхувал табшурмиш гъапIну.
