Гъубшу йисан декабрин эвелариъ жилирихъди ва жвуван кьюрид шубарихъди чпин машиндиъди отпускдиз гъягъюрайиган, Оксана Вагьабовайин хизан аварияйикк ккабхъру. Оксана амрихъна гъюруган, жилир, амриан душну, чIули дидиснайи, хъа бицIину шуран ибариан ифи гъябгъюрайи.
Думуган рякъюъ гъабхьи бедбахтвалин дюшюшдиъ Оксанайин вари хизан кечмиш гъабхьнийи. Дидхъан мина сад йис гъубшну. Амма Оксана гьелелиг чаина дуфнадар. Ва дугъу, чан бедбахтваликан ктибтури, варидарикан рякъяриъ хатIасузвал уьбхюб ккун апIура.
Дурар рякъюъ учIвруган, аьхю йиф убгъурайи. 10 йисаъ айи Кира ва чан яш 8 йис дубхьнайи Полина машиндиъ гъаахнийи. Оксанайи жилириз, гьацI сяаьтналан гьав-йир дигиш дархьиш, хулаз хътаркурхьа кIури, теклиф апIуру. Амма Евгенийди жаваб тувундайи. Варидарин хабарсузди ккабхъу кьюрдун отпускдиз гъягъюз кьаст айи. Ивановойиан удучIвну 100 километрин рякъ ккадапIган, дурарин машиндихъ жара машин йивуру.
«Нефес хътабгъуз мухриан гъагъиди вуйи, мидланра гъайри, гагулну лик ккубсуз шуладаршра, машиндиан эдеуз чара гъапIунза. Машин кьюб йишваз пай дубхьнайи. Узу сифте жилирихьинди, Кирайихьинди дарш Полинайихьна гъушнуш, фикриъ имдариз. Узхьан шуладаршра, узу йиз хизанариз сабпи кюмек тувуз чара апIурайза. Лишнариинди вари гъийихуб рябкъюрайзуз, амма узу узухъ хъугърадайза», – ктибтра Оксанайи.
Аязну хилар даргъну, Оксанайихьан чан Полинайиин чекмйир алахьуз шуладайи. Дугъу чан хилариин термосдиъ айи убцру шид улубзу. Кьанди больницайиъ айиган, чан хилариин али хам гьаз алдабхъураш, думу гъавриъ гъахьи. Евгений Мягьячгъала шагьриъ айи тикилишчивалин компанияйин начальник вуйи. Шубарира мектебдиъ ужадар аьгъювалариинди урхурайивалиин адаш ва дада разиди айи.
Авария гъабхьи йишвахь саб-сабдихъди машинар дерккуз хъюгъю. Оксанайиз дурарин машиндихъ гъиву Land Cruiser машиндин эйсийи чав тахсиркар даруваликан, чаин хизан айи машин улубчIвуваликан кIурайи. Саб вахтна Оксанайиз таниш дару сар жигьил бали дугъахьинди видеорегистратор гьачIабккуру ва, гьаму бис, лазим хьибдивуз, кIуру. Дерккрайи машинариъ айидари, мани палтар хури, бицIидариин илирчурайи ва Оксанайиз кюмек апIурайи.
«Думаган узу гьарйир, чIигъар апIури затра кIваинди дариз. Аьксина, узу машниин хил иливну, фтихъ-вуш лицури гъахьунза. ГучI хьувалин аьзиятнаан зийнарин иццрувал затра гьисс апIури адайза. Гьадмуган медицинайин тяди кюмек тувру машиндизси, йиз али уьмриъ сабдизра ккилигур дайза. Духтрар хъуркьубси, вари аьжалин бацаригъян гъюдучIвиди, дурари кюмек тувди кIури, фикир апIурайза. Думу вахт аьхир адрубси гьибгърайзуз…
Медицинайин гъуллугъчйир гъафи, дурарин кьяляхъди МЧС-дин машинра хъубкьу. Евгений адагъбан бадали, МЧС-дин машин лазим вуйи. Медицинайин тяди кюмек тувру вакилар гьапIрушра мюгьтал духьнайи. Дурарик гъалабулугъвал кабхънайиб рябкъюрайзуз. Сар духтир-дишагьли узухьинди дуфну, Кира ва жилир кечмиш гъахьиваликан гъапнийи. Хъасин дурари Полинайин гъюниз руб гъиву. Полина носилкйириин ккау ва машиндиз гъурху. Гьадму машиндиъ узура итнийи. Дишди кIурза, думуган Полинайихьинди лигури, яраб гьаму ришкьана чIивиди гъузуз ккунийкIана кIури, ккарагуз хъюгънийза. Духтрари машиндиъ чпихьан шлу жафйир зигури айи. Амма саб вахтна дурари, сар-сарихьинди лигури, шуран машниин лизи чарч илипу…», – ишури ктибтурайи Оксанайи.
Суддиъ шагьидарин ва видеорегистраторин кюмекниинди тахсир Land Cruiser машин хъапIрайиринуб вуйиб тасдикь гъапIну ва думу кас 6 йисан дустагъдиъ итбан къарар адабгъну.
Рякъяриъ гьарсаб бедбахтвалин дюшюшдин тахсиркрар ва тахсир ктарди аьзабнаъ ахърайидар, зийнар шулайидар, уьмриан гъягъюрайидар шулу. Гьарсаб дюшюшдиъ чан тарих а. Гьаму зиихъ учу мисалди гъабхи дюшюш анжагъ агъзрарикан сабтIан дар. Рякъяриъ ихтиятди духьну ккунду. Амма ихь инсанар гьаммишан наана-вуш гьялакди шулу.
Макьалайин аьхириъ кIваин апIуз ккундузузки, 2022-пи йисхъан мина рякъяриъ машинар хъаъбан гьяракатнан хатIасузвал тямин апIбан цирклиъ саб жерге дигиш’валар тIаъна. Гьамус ПДД чIур апIру, рякъюъди гъягъбан къайдйир дюрюрхру водителариин аьхю журум илибтIуру ва дурар шубуд йисазкьан дустагъдиъра итру.
Гьамускьан ихь рякъяриъди машинар хъаъбан аьгьвалат къайдайиз гъюр, душваъ арайиз гъюрайи бедбахтвалин дюшюшар цIиб шул кIури, миж кивдихьа.
