2022-пи йисан 3-пи январилан 9-пи январиз вуйи улупбариинди, Дагъустан Республикайиъ рякъюнна транспортдин 20 хатIалу дюшюш гъахьну. Региондин Госавтоинспекцияйин мялуматарин дакьатари туврайи хабрариз асас вуди, аварйириъ 4 кас гъийихну. Думу улупбар гьар йигъан дигиш шула.
ГИБДД-йин гъуллугъчйири, машиндин рулихъ дусрайидариканси, яягъди гъягъюрайи ватандашариканра рякъюн гьяракатнан къайдйир тамам апIувал ккун апIура.
КIваина хурача, 2022-пи йисан сабпи январилан мина, рякъяриъ хатIасузвал тямин апIбан бадали, къанундин къайдйириъ дигиш’валар тIаъна. Уголовный кодексдиъ дигиш’валар тIаъбан къанундиин къул дизигна. Гьамус рякъюн гьяракатнан къайдйир чIур гъапIдарин чIатху журум апIбалан савайи, дурариз суддин къарарниинди жаза тувуз ва 3 йис’инакьан азадвалихъ мягьрум апIуз мумкинвал а. Рякъюн гъаншарди машинар гъюру терефназди машин хъапIувализ ва машиндин гьяракат гизаф за апIбаз лигну, кьюб ражари административный жавабдарвалихъна гъахидар шубубпи ражари журум апIбиинди жазайиккан ккудучIвидар. Шубубпи ражари думу жюрейин къайдасузвал гъапIу кас уголовный жавабдарвалихъна хиди.
***
Аьхиримжи вахтна Дагъустандиъ гизаф дишагьлийири машинар хъауз хъюгъна. Думу ужуб ляхин ву, фицики варидарин хизандиъ машин хъапIуз шлу жилижви ади шулдар. Вушра машин хъапIувал модайиз илтIибкIувал дюз дар. Машин хъапIуз дубгъувал читин ляхин дар, ав, дишагьлийихьанра рягьятди машин хъапIуз дубгъуз шулу. Хъа, гьарсаб ляхниъси, гьадму ляхниъра чан къайдйир а. Гьамус ихь шагьрарин кючйир машинари ацIна. Саб-сабдихъди рякъюъди гъягъюрайи машинарин арайиъ айи манзил лап цIиб ву, дурар саки саб-сабдихъ хъючIюкьну гъягъюри шулу. Гизаф квартирйир ккайи хуларин гьяятариъ хябяхъдин вахтна думу дебккуз йишв адарди шулу. Гьаддиз машин хъапIуз ккуни касдиз машин хъапIбан, кючейиъ дебккбан къайдйир аьгъю апIувал чарасуз лазим ву. Къайдйириъ улупнайи вари гьяракатарин жюрйир лап гизаф ву. Ихь шагьрарин кючйириъ айи машинар хъаърайи вари инсанариз думу къайдйир бажагьат аьгъяшул. Хъа гизаф касар, чпиз машин хъапIбан къайдйир, аьгъяшра-аьгъдаршра ахтармиш дарапIди, пулихъ машин хъапIуз ихтияр туврайи документ гъадабгъну, машиндин рулихъ дусра. Думу дюз ляхин дар. Эгер учвуз ичв уьмрикан дерд ктарш, учвухъди рякъюъ айи жара касдин уьмрикан фикир апIинай. Машин хъапIуз аьгъячуз кIури, рякъюъди машин хъапIбан къайдйир аьгъдарди, шагьрин рякъяриз муудучIванай. Рякъюъди машин хъапIувалин къайдйир хъайи-хъайиганси кIваълан апIинай.
