2021-пи йисан Дагъустандиъ ляхин адру касарин кьадар 3,7 ражари ис гъабхьну. Дидин гьякьнаан Дагъустан Республикайин зегьметнан ва яшайишдин артмиш’валин министерствойиан мялумат тувра.

 

Республикайин агьалйир ляхниз гъадагъувализ кюмек апIбан программайиинди, агъзуриинакьан бикарар жюрбежюр ляхнариз кьабул дапIна.
«2021-пи йисан январин садпи йигъаз вуйи улупбариинди, республикайиъ ляхин адру инсанарин кьадар 106403 кас вуйи. Гъийин йигъаз гьадму кьадар 37090 касдиина ис гъабхьну, саб гафниинди, ляхин адрударин кьадар 3,7 ражари цIиб дубхьна», – хабар тувра министерствойин мялуматарин гъуллугъну.
Дагъустандин экономикайин артмиш’валин улупбариинди, коронавирусдин уьзур тарабгъувализ аькси вуди кьабул гъапIу къайдйири зегьметнан рынокдиъ читинвалар арайиз гъахнийи. Хъа 2021-пи йисан бикарарин кьадар цIиб хьуз хъюгъну. 2021-пи йисан сабпи январиз гьисабназ гъадагънайи бикарарин кьадар 106 403 кас вуйиш, 2021-пи йисан шубубпи кварталиъ республикайиъ гьисабназ гъадагънайи бикарарин кьадар 59 агъзур гъабхьнийи. Республикайин экономикайин артмиш’валин министерствойиан туву мялуматариинди, 2021-пи йисан 22,6 агъзур касдиз лихру йишвар ачмиш апIувал планламиш дапIнайи. Гьадму кьадарнакан 9,5 агъзур – гьаммишан лихру, 4 агъзур – фасларин вахтна ва 9 агъзур – жикъи вахтнан арайиъ лихру йишвар вуйи.