1991-пи йисан 28-пи декабриъ удубчIву РСФСР-ин Верховный Советдин Президиумдин къарариз асас вуди, 13-пи январиъ урусатдин чап апIбан дакьатарин Йигъ къайд апIура.
1703-пи йисан гьаму йигъан Москвайиъ «Москвайин гьюкуматдиъ ва гъирагъарихъ хъайи уьлкйириъ гъахьи кIваинди гъитуз ва гьюрмат уьбхюз лайикьлу дявдин ва жара ляхнарин гьякьнаан хабрар» кIуру урус чIалниинди вуйи сабпи газат удубчIвну. Думу урусатдин император Петр Сарпирин указдиинди чапдиан адабгъуз хъюгънийи.
Хъа 1711-пи йисан «Ведомости» ччвурнаккди газат Петербургдиъ чапдиан адабгъуз хъюгъну. Сифте дидик чап апIури гъахьи аьхю пай макьалйир урусатдин армияйин гъалибваларикан вуди гъахьну. Хъасин ватандаш’валин ислягь уьмрикан ва уьлкейин хъуркьувалариканра макьалйир чап апIуз хъюгънийи.
Гьаддихъанмина магьа шубуб аьсир кечирмиш гъахьну, ва, гьелбетда, думу газатдин ччвур дигиш хьпахъди сабси, хайлин жара газатар ва журналар чапдиан удучIвуз хъюгъну. Гъи Роскомнадзориъ гьисабназ гъадагънайи, Урусатдиъ чапдиан удучIвурайи махлукьатлу хабрарин дакьатарин кьадар 40 агъзурихьна ву. Анжагъ Дагъустандиъ, гьар йигъан, гьар гьяфтайиъ, вазлик сабан, кьюб вазлик сабан удучIвури, 200-дихьна газатар ва журналар чапдиан адагъура.
12-пи январиъ Мягьячгъалайиъ, Урус театрин аьхю залиъ, урусатдин чап апIбан дакьатарин Йигъаз бахш дапIнайи серенжем кIули гъубшну. Дидин тешкилатчи РД-йин мялуматарин ва чап апIбан министерство вуйи.
Серенжем ачмиш апIури, дагъус-тандин чап апIбан ляхнин тарихнаан документальный жикъи фильм улупнийи. 1906-пи йисан «Дагъустан» ччвур алди урус чIалниинди сабпи газат удубчIвуз хъюбгъну. Хъа 1917-пи йисхъан мина милли газатарира чпин тарих ккебгъну.
Вахтназ вуди РД-йин мялуматарин чап апIбан министрин вазифйир тамам апIурайи Уьмаруьсман Гьяжиевди уч духьнайидар му Йигъахъди теб-рик гъапIнийи ва журналистарин терефназ хайлин ужудар гафар гъапнийи. Гьацира министри, журналистарин чпи апIурайи ляхнихьна артухъди аьшкь хьпан бадали, дидиз лайикьлу кьимат туврайи республикайин дережайин пешкешар тувувал гьяракатнаъ ипбан теклиф хьади РД-йин Правительствойиз илтIикIуз планламиш дапIнайиваликанра мялум гъапIнийи. Журналистари му теклиф гурлу гарччлариинди къаршуламиш гъапIну.
Серенжем давам апIури, министри чпин ляхниъ заан устадвал улупу журналистариз гьюрматнан грамотйир тувнийи.
Журналистар чпин пишекарвалин Йигъахъди тебрик апIури, вахтназ вуди РД-йин милли политикайин ва диндин ляхнарин министрин вазифйир тамам апIурайи Энрик Муслимов, вахтназ вуди РД-йин жигьиларин ляхнарин министрин вазиф-йир тамам апIурайи Камил Сяидов, РД-йин Халкьдин Собраниейин депутат Илман Аьлипулатов удучIвну гъулхнийи.
Му йигъан республикайин махлукьатлу хабрарин дакьатарин вакилар жюрбежюр пешкешарихъди лишанлу гъапIнийи. Гьадрарин арайиъ, республикайиъ миллетарин ва динарин арайиъ ислягьвал уьбхбак ва мюгькам апIбак пай киври, сатIиди ляхин апIбаз лигну, РД-йин милли политикайин ва диндин ляхнарин министерствойин терефнаан «Табасарандин нурар» газатдиз гьюрматнан грамота тувнийи.
Хъасин Дагъустандин журналистарин Союздин председатель Аьли Камаловди, гизаф йисари заан устадвалиинди журналиствалин ляхин дапIну, гьамус лайикьлу рягьятвалиъ айи яшлу журналистар Дагъустандин журналистарин Союзди тасдикь дапIнайи «Дагъустандин журналистикайин легенда» заан ччвурар тувбиинди лишанлу гъапIну.
Серенжем концертдин программа улупбиинди давам гъабхьнийи.
