Республикайин махлукьатлу хабрарин дакьатарин, чап апIбан ва полиграфияйин индустрияйин гъуллугъчйир, цирклин ветеранар!
Урусатдин чап апIбан Йигъахъди аьлакьалуди йиз варитIан мани тебрикнан гафар кьабул апIинай!

Гъийин девриъ махлукьатлу хабрарин дакьатари политикайин, экономикайиин ва ихь уьмрин имбу цирклариз туврайи тясир зурбаб ву.
ЦIийивалариз дилигди, прессайи гизафси жямяаьтлугъдин кефият тяйин апIура, дидихъ хъугъра ва хъпехъура. Ухьуз гьаруриз жюрбежюр булагъариан мялуматар гъадагъуз мумкинвал ахьуз. Гьаддиз инсанарин фик-рар ва юкIвар бадали гъабхурайи женг хъанара учIру шула.

Гъи махлукьатлу хабрарин дакьатарин ляхин дагъустандин гизаф миллетарикан ибарат вуйи халкь сатIи апIру, уьмуми кьиматлувалар ва лишнар кIалибназ хру егин кьувват шула. Ихь юрднан хусусивал ва рюгьнан кьиматлувалар уьрхбаъ асас роль уйнамиш апIурайиб милли пресса ву. Гьар йигъан СМИ-йин дакьатариъ туврайи хабрари, чап апIурайи аналитикайин макьалйири аьхюну пайси ихь республикайин сурат, дагъустанлуйирин кефйир яратмиш апIура, жюрбежюр фикрар атIагура, къарарар адагъуз тясир апIура.

Учву гьюкмина жямяаьтлугъди гьаммишан сюгьбат гъабхуз шартIар арайиз хурачва, инсанар сатIи апIурачва, гъаврикк ккаъбан ва мярифатнан зурба ляхин гъабхурачва.

Мялуматар тувбан гьякьлувализ, эдеблувализ, ичв газат урхурайидар уж’валнахьна жалб апIувализ, рягьти дару муддатнан читинвалар ккагъуз кIваантIан кюмек апIуз гьязурвализ махлукьатлу хабрарин дакьатарин жямяаьтлугъдиз чухсагъул кIураза. Коронавирусдин инфекция тарабгъбаз аьксивал улупбаъ учву гъабхурайи ляхнин метлеблувал къайд апIуб важиблу вуди гьисаб апIураза.

Цирклин ветеранариз жаради чухсагъул мялум апIураза, гьаз гъапиш учву гъазанмиш гъапIу удукьувалар тажрубайин, бажаругъвалин ва аькьвлин удрубкъру булагъ ву, дурар дарди улихь гъягъюз шулдар.
Ихь республикайин, Урусатдин хайирназ вуйи вари ичв ккергъбариъ кIваантIан учвуз мюгькам сагъ’вал, гьевеслувал, яратмиш апIбаъ хъуркьувалар ва ягъурлувал ккун апIураза!