Январин 19-пи йигъан Москвайиъ Урусатдин Федерацияйин Правительствойин Председателин заместитель Александр Новак Дагъустан Республикайин Глава Сергей Меликовдихъди гюрюшмиш гъахьну. Дурарин арайиъ гъабхьи сюгьбатнаъ Дагъустандиъ туристариз ужудар шартIар яратмиш апIувалин, энергетикайин ва ЖКХ-йин артмиш’валин месэлйир гьял гъапIну.

 

«РФ-дин Правительствойиъ Кафари Кавказдин месэлйирин гьякьнаан жавабдарвал гъабхурайир Александр Новак ву. Республикайиъ Федеральный кюмек дарди гьял апIуз читин вуйи месэлйир гизаф ади шулу. Федеральный идарйирин кIулиъ айидарихъди гъахру гюрюшариан рябкъюрайиганси, Дагъустандихьан думу кюмекнак умуд кивуз шулу», – мялум гъапIну Сергей Меликовди Инстаграмдиъ айи чан машнаъ.

Гюрюшдиъ гьацира Урусатдин Президентдин пресс-конференцияйин натижйириинди туву табшуругъар уьмриз кечирмиш апIбан, гьадму гьисабнаан, республикайин ЖКХ-йин циркил цIийи алапIбан месэлйир гьял гъапIнийи. Региондин Главайи къайд гъапIганси, думу цирклиз аьлава инвестицйир жалб апIиди.

Энергокомплексдин мюгькам ляхин тямин апIбан ва газдихъди тямин апIувалин ляхник гьяракат кипбан бадали, «Газпромдин» бинайиинди газ пай апIру ва «Россети» компанияйин бинайиинди эйсивал хътру циркларин ляхин сатIи апIуз йикьрар гъапIну.

Дагъустан Республикайин милли культурайин жюрбежюр тафавутлу аьдатар уьрхюри, республикайиз гъюру туристарин кьадар артухъ апIбан месэлйирра гъитIирккну. Гьацира Дагъустандин яшайишдинна экономикайин артмиш’валин уьмриз кечирмиш апIурайи месэлйириканра гъулхну.
Сергей Меликовдин гафариинди, Урусатдин вице-премьери, гъитIирккнайи вари месэлйир уьмриз кечирмиш апIбан гьякьнаан кюмек тувбан ва республикайиъ айи мумкинваларихъди ерли йишв’ин таниш хьпан бадали, хьадукран вахтна Дагъустандиз гъюз гаф тувну.

«Александр Валентинович, хялар ужуди кьабул апIуз аьгъю региондиъ увуз ккилигурача!», – аьлава гъапIну РД-йин Главайи.