Норвегия, Германия, дарш Урусат? Олимпиада ккебгънадар, хъа экспертари прогноз гьязур дапIна…
Урусатдин Олимпиадайин комитетди Китайдин Пекиндиъ кIули гъягъру Олимпиадайин талитариъ иштирак шлу ихь уьлкейин уч дапIнайи командайиз дахил шулайи спортсменарин сиягь тасдикь гъапIну. Пекиндиз Урусатдин 212 спортсмен гъягъиди. Дурарикан 103 дишагьлийир ва 109 жилар ву.
Гьаму йигъари Олимпиа-дайин талитарихьна гьязур шулайи спортсменариз Урусатдин Президент Владимир Путинди сагъ’вал ва гъалибвалар гъадагъуз кьувватнан гьиссар артухъ хьувал ккун гъапIну.
«Ухьуз аьгъяхьуз, олимпиадайин тамшириъ пучIу талитар шлуб дар. Учвуз фукьан гъагъиди алабхъураш, учу гъавриъ ача. Учу, кIваантIан ичв тереф уьбхюри, ичв хъуркьуваларик миж киврача. РФ-дин уч дапIнайи командайиъ айи ихь вари спортсменари, уьлкейин спортдин мектебдин пишекарвалин заан дережа ва устадвал тасдикь апIури, чпин вари кьувватар ва мумкинвалар ишлетмиш апIрувалиин умудлу вуча», – къайд гъапIнийи президентди.
Кьюрдун XXIV Олимпиа-дайин талитар февралин 4-20-пи йигъари Пекиндиъ кIули гъягъиди. Думу талитариъ вари дюн’яйиан 4 агъзуртIан артухъ спортсменар иштирак хьиди. Спортдин 7 жюрейин 15 цирклиан 109 медалин гъварч бадали талитар кIули гъягъиди. Урусатдин команда талитариъ Урусатдин Олимпиадайин комитетдин ччвурнаккди ва пайдгъиккди иштирак хьибди. Уьлкейиан варитIан дирбаш спортсменар фигурный катание, хоккей, биатлон, кёрлинг, бобслей жюр-йириъ ва лыжйирин талитариъ иштирак хьиди.
Фигурный катаниейиан уьлкейин командайин гьякьнаан экспертарик саб жюрейинра шаксузвал ктар. Федерацияйи Китайиз гьамусяаьт уьлкейин варитIан ужударстар спортсменар гьаъну. Амма, гьяйифки, дурарикан сар вуйи Михаил Коляда, коронавирус кайивал тасдикь апIру тестдин улупбарин натижайи Олимпиадайихьан гъапIну.
Мидланра гъайри, ковиддин тIягъвнихъди аьлакьалу вуди, ихь уьлкейиан вуйи спортсменар НХЛ-ди Олимпиадайиз деетундар. Гьаддиз хоккейиан уч дапIнайи ихь команда КХЛ-ин спортсменарин вакиларикан ибарат дубхьна.
Олимпиадайин асас серенжемар февралин 4-диъ ккергъди. Талитар ачмиш апIбан серенжемариз лигуз 91 агъзур тамашичйирихьан гъюз шулу. Серенжемарин шадлугънан программа тешкилатчйири жиниди гъибтра, хъа дидин маракьлу аьламатарикан гьамусмиди улхбар а. Олимпиада ачмиш апIбан ва хъябкьбан шадлугънан серенжемариъ иштирак хьуз Китайдин вакцинайин руб йивнайи агьалйирихьантIан хьибдар. Олимпиадайин сюгьриан гьякал ва лишан дуствалин ва гьюрматнан рафтарин Бин Дунь Дунь панда гьяйванат ву.
Олимпиадайин прогнозарикан гьаммишан улхурайи америкайин компанияйи медаларин гьисабариъ сабпи йишв Норвегияйин командайи гъадабгъруваликан кIура. Экспертарин фикрариинди, Норвегияйин спортсменари 45 медаль гъазанмиш апIиди. Букмекерарира сабпи йишв дурариз тувра. Экспертарин улихь ккимиди вуйи фикрариинди, Олимпиадайиъ кьюбпи йишв Германияйин, хъа шубубпи йишв – Урусатдин спортсменари бисиди. Кьюбпи ва шубубпи йишвариин али командйирин арайиъ анжагъ саб гъизилин медалин фаркь’валтIан хьибдар. Думу прогнозар дюзидар вуш ва ихь командайихьан хъана зиина удубчIвуз шулуш, февралиъ лигидихьа.
