Дербент шагьрин ЦГБ-йин духтир, эпидемиолог Рустам Рамазанов, Дербентдиъ коронавирусдин тIягъвнихъди аьлакьалуди арайиз дуфнайи читин аьгьвалатназ лигну, шагьрин агьалйири уьзриз акьси рубар йивбан бадали, Дербентдиъ яшамиш шулайи гьарсар касдихьна илтIикIура. Дугъу чан улхбаъ гъи Дербент шагьриъ арайиз дуфнайи аьгьвалатнакан гьамци мялум гъапIну:

 

«Дербент шагьриъ коронавирусдин тIягъвнихъди аьлакьалу аьгьвалат йигъ-лан-йигъаз гужал ва пис шулайивализ лигну, ухьу му ляхнихьна кьастлуди, фагьумлуди янашмиш духьну ккунду. Магьа 2 суткайин муддатнаъ 168 кас коронавирусдиан ктIерццувал ашкар дубхьна. Мициб аьгьвалат арайиз гъюбан асас себеб – агьалйирин арайиъ вакцинайин руб йивувалин зарарнакан тарагъурайи улхбари уьзриз акьси рубар йивбан ляхин яваш апIурайивал ву. Гьамусяаьт ихь республикайиъ гьисабназ гъадагънайи улупбариинди, коронавирусдин инфекцияйин 22-пи январиъ 342 кас ва 23-пи январиъ – 283 кас аьзарлу духьна. КетIерццнайидарин аьхюну пай Дербент шагьрин терефнан агьалйир ву. Урусатдин Президент Владимир Путиндира кмиди Дербент шагьрин аьгьвалат чан гюзчиваликкна гъадабгъна.

Гизаф инсанар иштирак шлу серенжемариъ ихтиятвал дапIну ккунду. Инсандин сагъ’вал – варитIан аьхю девлет вуйивал кIваълан магьарханай. Му коронавирусдин уьзур гъювалихъди аьлакьалуди ихь инсанарин уьмурра читин гъабхьну, амма, жвуван ва имбударин сагъ’вал бадали, гьарсар ватандашди духтрарин тIалабар тамам дапIну ккунду. Руб гъивну кIури, жвув иштирак шулайи серенжемариъра ихтиятвал дапIну ккунду. Коронавирусдин уьзур тарабгъувал дебккбан бадали, региондин гьарсар агьалийи учв жямяаьтлугъ йишвариз гъягъруган, машналан маска алдабгъну ккундар, ва гьацира инсанарин арайиъ манзил уьбхювал лазим ву. Эпидемиологияйин гьял лапра харжи дархьбан бадали, диспансеризация апIувал ва рубар йивувал чарасуз лазим ву».