25-пи январиъ къайд апIру студентдин Йигъ гизаф жигьилариз машквар ву, фицики аьхюну пай жигьилари жюрбежюр вузариъ ва сcузариъ урхура. ЦIийи йисандин машкврар ккудукIбалан кьяляхъ, йисандин арайиъ кьюб ражари студентарин кIвазра, кIулизра аьзаб тувру сессияйин вахтра аьхирихъна дуфна. Студентарин тятIиларин вахт улубкьузра гизаф вахт имдар.

 

Студент вуди гъахьи гьарсар касдиз мялум вуйиганси, вуздиъ, сcуздиъ жвуван таярихъди урхури адау йисар – саб жара вахтнахьдира тевуз даршлу, шадлу, гележегдин ужудар хияларихъди юкIв абцIнайи вахт ву. Гьелбетда, урхурайи вахтна читинваларра алахьуру, имтигьян тувуз гъагъиди вуйиган, студентвалин уьмур варитIан читинубси гьугъубжвуру.

Гьамусдин деврин студентариз улихьдин заманайин студентаризсдар читинвалар адар. Белки гьаддиз советарин деврин студентари гъийин студентарин аьгъювалариз, дурарин дирбаш’вализ асккан кьимат туврашул!? Ужудар студентар советарин девриъра гизаф айи, хъа думуган харжи аьгъювалар айи студентар адайи пуб дюз дар. Ужудар аьгъювалариинди имтигьян тувру, хъа аьгъювалар адарди, фу дапIнура имтигьян тувуз чара абгру студентар фуну вахтнара ади гъахьну.

Студентарин уьмриан вуйи саб зарафатнан дюшюшдикан ктибтуз ккундайиз. Сессия гъябгъюрайи вахтна имтигьяндин улихь мялимди студентариз гъапну: «ВаритIан аьламатнан шпаргалка гьязур гъапIуриз ужуб кьимат дивурза». Хъайигъан студентар имтигьяндиз гъафну, ва гьарури чан шпаргалка мялимдиз улупну. Сар студентдин шпаргалка 5 метр ярхишин алиб вуйи, мялимди думу варитIан аьламатнанубси гьисаб гъапIну. Вари студентарихьан шпаргалкйир чахьна гъадагъну, мялимди дурарихьди лазим вуйиси имтигьян тувуз гъитну. Хъа чаз варитIан кьабул гъабхьи шпаргалкайин эйсийиз ужубсиб кьимат дивну.

Студентди гъахьи гьарсар касдихьан йицIбариинди гьаму жюрейин зарафатнан ихтилатар ктитуз шулу. Жигьил студентарин ва уьмрин аьхю тажруба айи мялимарин арайиъ лап маракьлу сюгьбатар гъягъюри шулу.

Къайд апIувал лазим вуки, Дагъустандиъ 2022-пи йис образованиейин Йисси мялум дапIна. Республикайин образованиейин минис-терствойин багахь мектебдиз гъягъюрайидарин ва студентарин Совет тешкил дапIна. Советдин дахилнаъ конкурсдин бинайиинди гъядягънайи, ужударсдар аьгъювалар айи 20 кас а. Думу гъурулушди образованиейин цирклиъ ужудар дигиш’валар тIауз кюмек апIур кIури, умуд кивурхьа. Дагъустандиан вуйи бажаранлу гизаф жигьилари Москвайин ва Санкт-Петербургдин вузариъ, уьлкейин жара шагьрариъ урхура.

Ужудар студентари, урхбаъси, жара ляхнариъра чпин дирбаш’вал улупуру. Варидарикан саб макьалайиъ улхуз даршул, хъа гьаму дюшюш фикир тутрувдира гъибтуз шлуб дар.

Гъубшу йисан ноябрин вазлиъ ДГМУ-йин студентар вуйи Исмяил Эскендеровдиз ва Карина Мутаевайиз, инсандин уьмур уьбхбаз, читин аьгьвалатнаъ дирбаш’вал улупбаз дилигу, РД-йин жигьиларин министерствойиан чухсагъул мялум апIбан кагъаз тувну.

Гьядиса студентар сентябрин вазлиъ Москвайиз форумдиз душнайи вахтна гъабхьиб ву. Метройиъ «Партизанская» станцияйиъ Дагъустандиан вуйи студентариз кюмек ккун апIурайи дишагьлийин сесер гъеерхьнийи. Лигуруш, рукьан рякъюн рельсариин, кIул ис дапIну, ифди алацIнайи риш дийигънайи.

«Дугъхьан ришвузкьан шуладайи, шураз яманди иццру дапIнайи. Таниш дару йишваъ мициб аьгьвалатнаъ гьапIрушра аьжуз духьнайзу. Вушра, кьан дарапIди, шурахьинди урсну, медицинайин тяди кюмекназ, полицияйиз дих апIувал ккун апIури, чIигъар апIуз хъюгънийза, амма йиз гьарйириз сарира фикир туврадайи», – ктибтура Карина Мутаевайи.

Зийнар духьнайи шурхьан ликар алдагъуз шуладайи. Метройиъ айи жара инсанарикан кюмек адрувал гъябкъиган, Дагъустандиан дуфнайи студентари, лап гъагъи гьялнаъ айи риш рельсарилан за дапIну, пассажирар поезддиъ эъру-эдеъру майдандиина адагъну.
«Учу дишлади думу скамейкайиин дитну, дугъан ифи марцц апIуз хъюгънийча ва учв рельсариинди фици ахънуш гьерхнийча. Гафар апIуз гъагъиди вушра, дугъу ктибтнийи: метройиъ телефондиз лигури гъягъюрайир, чазра хабар дарди думу рельсариинди ахъну. Шураз лап гучI дубхьнайи, дугъан жандиан гукIнишин удубчIвурадайи. ЦIиб вахтналан гьамина полицияйин вакиларра, медицинайин тяди кюмек тувру духтрарра хъуркьнийи», – ктибтну студент шуру.

Мицисдар дирбаш студентар Дагъустандиъ гизаф а. Гьяйифки, ихь жигьиларин ад тербия хътру, уьмриъ чпин рякъ дибрихъу инсанари чIур апIуру.
Гьюрматлу студентар, ичв машкврин Йигъ мубарак ибшри, сессия тувузра, шадвал хъапIузра учвуз гьарган вахт бихъричвуз.

Шиклиъ: ДГТУ-йин студентар.