Дагъустандиъ коронавирусдин уьзур гьяракатниинди тарабгъурайивализ лигну, апрелин 1-пи йигъазкьан вари жюрейин динар хъаъру агьалйириз мистариз гъягъювал къадагъа дапIна. Региондин Роспотребнадзорин кIулиъ айи Николай Павловди дидин гьякьнаан указдиин къул гъизигну.

 

Документдиз асас вуди, диндихъди аьлакьалу вуйи ляхнар, гъудгнар манзилнаъди дапIну ккунду. Мистариз гъягъюз, дурар лихбан бадали, чарасуз лазим вуйи, диндин гъуллугънаъ айи касаризтIан ихтияр адар. Гьаддихъди сабси, Дагъустандин санитарвалин аьхюну духтри майит жибкIруган, саламдиз уч шлуган, нюкягь апIруган, сумчрар кIули гъахруган, диндихъди аьлакьалу жара аьдатар тамам апIруган уч шлу агьалйирин кьадарра улупну.