РД-йин экономикайин артмиш’валин министерствойи муниципалитетариз хабар туврайиганси, 2022-пи йисан «100 мектеб» проектдиъ иштирак хьуз аьрзйир кьабул апIуз хъюгъна.

 

«100 мектеб» проект Дагъустандиъ республикайин гьюкмин ва спонсорарин кюмекниинди 2018-пи йисхъан мина уьмриз кечирмиш апIура. Гьаму вахтнан арайиъ 575 мектеб рас апIуз удукьну. Республикайин бюджетдиан му метлебариз уьмуми кьадар 851,3 миллион манат харж гъапIну, хъа спонсорарин кюмек – 336 миллион манат.

Гъубшу йисан му программайиъ уьмуми образованиейин 105 тешкилатди иштирак’вал гъапIну. Дурар рас апIуз республикайин бюджетдиан 200 миллион манат жара гъапIну, меценатарира – 50 миллион манат.

«Гьаму йисанра республикайин бюджетдиъ му метлебариз 200 миллион манат улупна. Проектар, РД-йин Правительствойин къарариинди тасдикь дапIнайи къайдайиз асас вуди, конкурсдин бинайиинди гъядягъиди», – дупна министерствойин пресс-гъуллугънан мялуматнаъ.

Конкурс гъабхбан ва дидиъ иштирак хьуз лазим вуйи документарин гьякьнаан аьлава мялуматарихъди РД-йин экономикайин артмиш’валин министерствойин хусуси сайтдиъ таниш хьуз шулу.