Дагъ. Огнийин глава Жалалудин Аьлирзаевди январин вазлин аьхириъ шагьрин, администрацияйин идарайиъ заан тярифназ лайикь гъахьи мялимар лишанлу апIбан совещание (шиклиъ) кIули гъубхну. Серенжемдиз шагьрин мектебариъ баркаллуди зегьмет зигурайи 8 мялимдиз теклиф дапIнайи.
«Наслариз аьгъювалар тувбан устадвал, дурар пишекарвалин ва уьмрин тажруба-йихъди таниш апIуз гьязурвал, эдебнан тербия хъади хьувал, зегьметниин юкIв аливал, читинвалариз табигъ дарувал – му вари лишнар анжагъ халис мялимаризтIан хас дар.
Гьюрматлу мялимар, ихь жигьил наслиз аьгъювалар ва тербия тувбан ичв читин ва гьюрматлу ляхниъ хъуркьувалар ишричвуз.
Мялимдин ляхнин эгьемият жямяаьтлугъдин уьмриъ аьхюб ву, гьаддиз гъи ихь уьлкейин руководствойин, РФ-дин мярифатнан министерствойин терефнаан дидиз аьхю фикир тувра. Узу учвуз жандин мюгькам сагъ’вал, уьмриъ хушбахтвал ккун апIураза», – гъапнийи, совещание ачмиш апIури, Жалалудин Аьлирзаевди.
Хъасин шагьрин кIулиъ айири совещаниейиз дуфнайи мялимариз «Урусатдин Федерацияйин мярифатнан министерствойин гьюрматнан гъуллугъчи» ччвур тувувал тасдикь апIурайи шагьадатнамйир ва думу пешкешнахьна вуйи мухрик китIру лишнар тувнийи.
Лишанлу гъапIу касарин ччвурар исихъ чап апIурача: Аразова Светлана Аьли-жановна – Дагъ. Огнийин 1-пи нумрайин мектебдин директорин урхбанна тербия тувбан ляхнин кюмекчи, Гьяжиева Альбина Камалудиновна – Дагъ. Огни шагьрин 3-пи нумрайин мектебдин директорин урхбанна тербияламиш апIбан ляхнин кюмекчи, Гьяжиева Гюлемсет Рамазановна – Дагъ. Огни шагьрин 4-пи нумрайин мектебдин мялим, Гюлягьмедова Эльнара Зугьрабовна – Дагъ. Огнийин 8-пи нумрайин мектебдин директорин кюмекчи, Кучкаева Элина Аьлипулатовна – Дагъ. Огнийин 7-пи нумрайин мектебдин директорин урхбан ва тербияламиш апIбан ляхнин кюмекчи, Кагьрабат Эседуллаевна Мурадялиева – Дагъ. Огнийин 7-пи нумрайин мектебдин мялим, Жентемирова Сахарет Нав-рузялиевна – Дагъ. Огнийин 5-пи нумрайин мектебдин мялим, Мирзоева Назира Наврузовна – Дагъ. Огни шагьрин образованиейин управлениейин кIулин сяняаьткар.
Лишанлу гъапIу вари мялимар тебрик апIури, дурариз газатдин редакцияйин терефнаан хъана заан хъуркьувалар ккун апIурача.
