Гъубшу нумрайиъ учу мялум гъапIганси, февралин 4-пи йигъан Китайдин Пекин шагьриъ кьюрдун 24-пи Олимпиадайин талитар ккергъну. Олимпиада ккебгъайиз кьюб сяаьт улихьна, «Ничхрин муг» стадион тамашичйири абцIнийи. Дупну ккундуки, думу стадион саки 100 агъзурихьна деъру йишвар айиб ву. Шадлугънан программайиъ тамашичйирин улихьна 500-тIан артухъ артистар ялхъвнар апIуз удучIвури гъахьнийи.
Олимпиада «Хьадукар улубкьувал» номериинди ачмиш гъапIну, ва дидин кьяляхъ Китайдин гимн гъивну.
Параддиъ вари дюн’яйин уьлкйириан 91 делегация иштирак гъахьнийи. Аьдат вуйиганси, сарпидарди Олимпиадайин ватандиан – Грецияйин спортсменар удучIвну. Бязи уьлкйириан вуйи спортсменариин, хъа асас вуди пайдагъ хьади улихьди гъягъюрайидариин, чпин ватандин милли накьишар кайи палат алийи, мисалназ, ЦIийи Зеландияйин ва Ригъ удубчIвру терефнан Тимор уьлкйирин спорт-сменариин. Саки вари делегацйириъ пайдагъ дишагьлийи ва жилижвуву гъабхури гъахьну. Мициб къайда вари халкьарин Олимпийский комитетди тяйин гъапIну. Дидин метлеб – жиларин ва дишагьлийирин арайиъ барабарвал дебккувал вуйи. Му къайда, Украинайин делегацияйилан гъайри, вари уьлкйири гъюбхну. Дурарин уьлкейин пайдагъ кьюр жилижви спорт-сменари сатIиди дибисну гъубхнийи.
Гьяйифки, Урусатдин спортсменариз ихь уьлкейин пайдагъ адабгъуз ва гъалибвалар гъадагъган, уьлкейин гимн йивуз къадагъа дапIна. Ихь спортсменар Урусатдин Олимпийский комитетдин лишниккди удучIвну (шиклиъ). Урусатдин делегацияйин дахилнаъ 80 кас айи. Пайдагъ конькйириинди жаргъбан спортдиъ варитIан дирбаш Ольга Фаткулинайи ва хоккеист Вадим Шипачевди гъубхнийи.
Трибунайилан спортсменар Урусатдин Президент Владимир Путинди къаршуламиш гъапIнийи. Ихь Президентдиз Китайдиъ стадиондин трибунайиъ йишв жара дапIнайи. ВаритIан аьхириъ Китайдин спортсменар удучIвну. Дурар Китайдин регьбер Си Цзиньпинди ва дугъан хпири шадди къаршуламиш гъапIнийи.
Шадлугънан серенжемар иштиракчи уьлкйирин ччвурар кайи йифун цIиркIварин параддиинди ва Пекиндиъ гъягъюрайи Олимпиадайин талитарин ва Паралимпиадайин тешкиллувалин комитетдин президентдин, вари халкьарин Олимпийский комитетдин президентдин ва Китайдин председателин удучIвну улхбариинди ва завуз деебту аьхю салютдиинди давам гъахьи.
Кьюрдун Олимпиадайин талитар 20-пи феврализкьан давам хьиди. Думу талитариъ спортдин 15 жюрйириан медаларин 109 гъварч пай апIиди. Урусатдин спортсменар спортдин вари жюрйириъ жанлуди иштирак шула.
Гъийин йигъаз (Олимпиада ккебгъну 6-пи йигъ) турнирарин таблицайин улупбариъ варитIан улихь Норвегия хьа. Му уьлкейин спортсменари 5 гъизилин, 3 арсран ва 4 кемшрин медалар гъазанмиш гъапIну. Дурарин кьяляхъ, хъучIукьну Германияйин спортсменар гъюра. Дурари 5 гъизилин ва 3 арсран медалар гъадагъну. Урусат гьеле 9-пи йишв’ин ал. Ихь спортсменари 2 гъизилин, 3 арсран ва 6 кемшрин медалар гъазанмиш дапIна. Му улупбар Олимпиадайин аьхириз швнуб-сабан гьюдюхиди. Дигиш’валарихъди ва маракьлу жара мялуматарихъди учву гъюру нумрийириъра таниш апIидича.
