Табасаран райондиъ бицIидариз ва живанариз коронавирусдиз аькси рубар йивуз хъюгъна. Улихьна йигъари райондин больницайиз «Гам-КОВИД-Вак-М» вакцинайин 80 руб гъахну. Дурар 12 йислан 17 йис’ина яшар айи баяр-шубариз йивуз улупнайидар ву. Дидин гьякьнаан Табасаран райондин ЦРБ-йин эпидемиологияйин отделин заведующий Мягьямед АгъатIаевди мялум гъапIну.

 

Дугъу къайд гъапIганси, бицIидариз вакцинайин рубар йивувал чпин хушниинди ва абйир-бабарин разивалиинди кIули гъябгъюра. Руб йивайиз улихьна бицIир педиатри ахтармиш апIура. Гъийин йигъаз вари 80 руб ишлетмиш дапIна, дурар гъиву бицIидарин сагъламвалин гьялра ужуб ву. Рубар гъиву баяр-шубарин сагъламвалин терефнаан саб жюрейинра дигиш’валар хьувал тасдикь дапIнадар, анжагъ цIибди бедендин температура за хьуб мумкин ву. Аьхюдаризси, дурарира 21 йигъ гъубшган вакцинайин рубдин кьюбпи пай йивиди.

М.АгъатIаевди аьлава гъапIганси, райондиъ коронавирусдин уьзрихъди аьлакьалу гьял къайдайиъ а, аьзарлуйир артухъ хьпан дюшюшар тасдикь дапIнадар.

Гьамусяаьт Табасаран райондин ЦРБ-йиъ, пневмония уьзур ачмиш дубхьну, 21 касди сагълам’вал мюгькам апIура, хъа 36 касди, пучIуди кетIерццнайидари, чпин хулариъ сагъ шула. Райондиъ коронавирусдин уьзриз аькси рубар йивувал жанлуди давам шулайивализ лигну, аьзарлуйирин кьадар артухъ шуладар.
Гъийин йигъаз Табасаран райондиъ 21134 касди коронавирусдиз аькси рубар гъивну. Му чарасуз вуди рубар йивну ккуни агьалйирин кьадарнакан 72,06% ву. Зиихъ ухьу чпикан гъапи 80 бицIирра гьаму гьисабнак кахьра. Мидланра савайи, райондиъ ревакцинация апIувалра жанлуди кIули гъябгъюра. Гьамусдиз 2870 касди ревакцинация дапIна.