Уьлкейин духтрарин ва аьлимарин улупбариинди, коронавирусдин цIийи штамм чпин яш 65 йис хьайиз вуйи инсанарин ва дидихьна иммунитет айидарин, яна улихьнаси коронавирусдиан аьзарлу гъахьидарин вая дидиз аькси прививка гъапIдарин, арайиъ гъагъи гьялназ дяргъиди улдубчIвуру. Хъа вакцинайин руб дириву ватандашарик уьзур 10 ражари артухъди гъагъи гьялназ гъюрайивалин дюшюшарра алахьуру.

 

Гъийин йигъан инсанари чпи коронавирусдин инфекцйирихьан фици дюрхну ккундуш, теклифар ва насигьятар гъадагъури, учу саки гьар йигъан духтрарихьна илтIикIурача. Гъийин ихь сюгьбатчи Ленинградский областдин, районарин арайиъ вуйи Токсовский кьялан больницайин невролог духтир, ихь ватанагьли, Табасаран райондин ТинитI гъул’ан вуйи Сафият Гьяжиева ву.

Ленинградский областдин Токсовский больницайиъ неврологди лихури, Сафият Гьяжиевайин хайлин йисар ву. Гъубшу йисан ноябрин вазлихъан мина дурарин больница уьру зонайиз илтIибкIну. Дугъан гафариинди, думугантIан гьамус коронавирусдиан аьзарлу шулайидарин кьадар гъюблан-гъюбаз артухъ шула. Мисалназ, улихьна йигъан Ленинградский областдиъ саб суткайиъ коронавирусдин аьзарлу гъахьидарин кьадар 9 агъзуртIан артухъ гъабхьну. Гьаму жюрейин улупбар муганайиз гъахьидар дайи.

«Накь (9-пи февралиъ – Ред.) ич больницайин медицинайин тяди хъубкьру кюмекнан линияйин телефондиз гвачIниан сяаьт юкьубдиз 600-тIан артухъ зенгар гъафну. Иццру гъахьи вари инсанарихьна гъягъюз духтрар хъуркьрадар, я медицинайин тяди кюмекнан дестйир гъахру мициб кьадар машинарра адар. Кюмек хъубкьайиз ккилилигди, хайлин инсанари аьзарлу гъахьидар больницайиз чпи хьади гъюра. Духтрар йишв-йигъ дарпиди лихура. ИкибаштIан, учура инсанар вуча. Му уьзри учура сикинди гъитрадар. Узу му уьзриан шубуб ражари иццру гъахьунзу. Магьа гьамусяаьтра йиз бедендин температура 38 градус вуйиз. Ляхниз дяргъюз чара адарзуз. Иццурайидар узуз ккилигура. Узузси, больницайиъ лихурайи духтрариз ва медсестрйириз, иццру гъахьнушра, коронавирусдин лишнар тасдикь гъахьундарш, бедендин температура 38 градустIан артухъ дарш, ляхниз дяргъиди хулаъ гъузуз ихтияр адар», – кIура Сафият Гьяжиевайи.

Духтрин гафариинди, больницайин кIулиъ айидари му жюрейин къарар кьабул апIувалин себеб гъи больницйириъ духтрар ва медсестрйир гьуркIри адрувалихъди аьлакьалу ву. Гъи хайлин больницйири кюмекназ медицинайин вузариъ ва училищйириъ урхурайи студентар жалб апIура. Гьамусяаьт аьзарлу шулайидарик гизафси коронавирусдин омикрон штамм ашкар шула.

«Омикрон, дишди гъапиш, коронавирусдин тмуну штаммартIан гьииди улдубчIвуру. Амма, жара вирусарихьди тевиган, думу инсанарикна 10 ражари артухъди тарабгъура. Аьзарлу гъахьидар духтрарихьна вахтниинди илтIитIикиш, дурарин арайиъ иммунитетдин гъурулуш лапра зяифди айидар вая сагъ апIуз даршлу гъагъи уьзрар кайидар аш, дурар сагъ апIуз лап гъагъиди алабхъуру. Коронавирусдин асас лишнар ухьуз варидариз ужуди таниш вухьуз, яна швнуд-сад йигъан дигиш даршули, бедендин температура 37,0-37,2 градусдиин гъубзувал, ликар-хилар иццру хьувал, хурагнан тIяаьм ва ниар дургувал. Хъа омикрондиан аьзарлу гъахьи касдин уьзур асас вуди фарингитдин вая аьдати ОРВИ-йин жюрейиинди улдубчIвуру.

Жвув уьзрарихьан уьрхбан бадали, узу ихь ватандашариз, анализар тувну, бедендиъ гьуркIри адру витаминар, йимишар ва мейвйир ишлетмиш апIбан, шлубкьан марцци гьавайихь вахт адапIбан, гизаф инсанар уч шлу йишвариз дурушбан, транспортдиъ маска алабхьбан, чIатариан хулаз гъафиган, машар-хилар жикIбан теклиф дивраза. Прививкайин гьякьнаан кIуруш, гьамусяаьт саки варидарихь прививка дапIнайивалин кагъзар хьа. Аьзарлу духьну, больницайиъ дахърайидариканра гьарсар кьюрпи кас прививка дапIнайир шула. Амма прививка гъапIдар, дугъриданра, гьииди сагъ шулу. Учу, духтрар, гьаци вуйивалин шагьидар вуча. Прививкара варидариз хай шулдар. Жюрбежюр гъагъи уьзрар кайидари вакцинайин руб йивайиз, ерли духтрарихьна илтIикIну, дурарин теклифарихъ хъебехъну ккунду», – аьлава гъапIну ич сюгьбатнаъ Сафият Гьяжиевайи.