Ккудубшу йисандин натижйириинди, Дагъустан Республикайиъ саки 500 агъзурихьнакьан инсанари налогар тувруган, 320 миллион манатдин льготйир ишлетмиш гъапIну кIури, Федеральный налогарин гъуллугънан Дагъустан Республикайиъ айи управлениейин пресс-гъуллугънан начальник Багьаудин Аьлиевди мялум гъапIну.

 

 

Дугъан гафариинди, улупнайи кьадар льготйирикан 86 агъзур касари транспортдин налогдин льготйир (63,4 млн манат), саки 221 агъзур касари жилилан туврайи налогдин (198,5 млн манат) ва 191 агъзуртIан артухъ касари чпин девлет-хазнайилан туврайи налогдин льготйир ишлетмиш дапIну, 58,1 млн манат кьяняаьт гъапIну.

«Эгер налогар туврайи касариз чпиз айи ккудубшу йисандин льготйир ишлетмиш апIуз ккундуш, жикъи вахтнан арайиъ налогарин инспекцияйиз аьрза бикIувал чарасуз лазим ву. Гьадму аьрза бикбан кьяляхъ, учвуз фицдар льготйир улупнаш, аьгъю хьибди. Хъа учву налогарин органариз дициб аьрза хътапIнуш ва думу аьрзайиъ льгота ишлетмиш апIуз шлу вахт улупундарш, сабансан аьрза хътапIуб лазим дар. Дупну ккундуки, налогар туврайи касари аьрза бикIруган, икибаштIан, чпиз льготйир чарасуз лазим вуйивал тасдикь апIурайи документарра улупну ккунду», – гъапну Багьаудин Аьлиевди.

Къайд апIуз ккундузуз, думу аьрза Урусатдин ФНС-дин электрондин жюрейин «Физический касариз вуйи хусуси кабинет» приложениейиан, МФЦ-йиан ва гьарурихьан, налогарин инспекцияйиз душну, гьадушв’ан тувуз шулу.