Улубкьнайи йисан 7-пи февралиъ, РД-йин сагъламвал уьбхбан министрин тялукь къарарниинди, вахтназ вуди Хив ЦРБ-йиъ кIулин духтрин вазифйир тамам апIрурди Индира Багъичева дерккну.

Индира Багъичевайиз (шиклиъ), райондин сагъламвал уьбхбан цирклиъ баркаллуди зегьмет зигбаз лигну, жямяаьтлугъдин арайиъ аьхю гьюрмат а. Думу 1994-пи йислан мина райондин агьалйирин сагъламвал уьбхбан гъаразнаъ дийигъна.

Индира Багъичева му жавабдар гъуллугъниин дерккувалихъди тебрик апIури, дугъаз райондин агьалйирин сагъламвал уьбхбан рякъюъ зегьмет зигуз мюгькам сагъ’вал, гъарашугъарин арайиъ сабвал ккун апIурхьа!

 

Индира Муъминовна Багъичева 1966-пи йисан Хив райондин Гъвандикк гъулаъ бабкан гъахьну.
Заан аьгъювалариинди мектеб ккудубкIну, думу 1987-пи йисан ДГМИ-йик урхуз кучIвру. Педиатрияйин факультет ккудубкIну, аьгъювалар гъадагъбан рякъ ДРКБ-йин бинайиинди интернатурайиъ давам апIуру.

Чан зегьметнан рякъ Индира Багъичевайи 1994-пи йисан Хив ЦРБ-йин райондин педиатрди ляхин апIбалан ккебгъру. Кьяляхъна йисари думу ЦРБ-йин бицIидарин отделениейин заведующийди, инфекцияйин отделениейин заведующийди гъилихну. 2004-пи йислан мина сифте «медицинайин тяди кюмек тувбан» отделениейин духтирди, кьяляхъна йисари душваъ заведующийдира лихури гъахьну.

2017-пи йисан, баркаллуди зегьмет зигбаз лигну, думу «РД-йин лайикьлу духтир» кIуру ччвурназра лайикь гъахьну.