Улихьна йигъари Пятигорск шагьриъ кIули гъубшу ЮФО-йин ACBJJ турнириъ бразилияйин джиу-джитсу жюрейиан талитариъ кIули гъушну. Дурариъ иштирак гъахьи СиртIич гъул’ан вуйи Марат Гьяжикъурбановди 77 кило гъагъ айи спортсменарин арайиъ 3-пи йишв гъадабгъну.

 

Марат Гьяжикъурбановдин хъуркьуваларикан мялум гъабхьиган, дугъахъди телефондиан сюгьбат гъубхнийза.Марат му жюрейин спортдиин машгъул духьну, сад йистIан дар. Муганаз думу юкьяр дисбан спортдиин ва боксдиин машгъул духьнайи.

Джиу-джитсу цIиб читин жюре вушра, Маратдиз думу, кчIихбарин имбуну жюрйиртIан, артухъди хуш ву, ва дугъу гъийин йигъаз тялукь хъуркьуваларра гъазанмиш дапIна.

Джиу-джитсуйиан Дагъустандин талитариъ гъалиб духьну, Марат ЮФО-йин талитариъ иштирак хьуз гъушну. Гьамусяаьт ихь спортсмен джиу-джитсуйиан майдин 4-5-пи йигъари Москвайиъ кIули гъябгъру Урусатдин чемпионатдиз гьязур шула.

Душв’ан Марат Урусатдин чемпион духьну гъювалик умуд кивдихьа.