Улихьна йигъари РФ-дин образованиейин Министерствойи тешкил дапIнайи «ВаритIан ужур классдин руководитель» конкурсдин региондин дережайин конкурс аьхирихъна гъафну. Думу конкурсдиъ республикайин районариан, шагьрариан 40-тIан артухъ мялимари (классдин руководителари) иштирак’вал гъапIну.

 

РД-йин образованиейинна илмин Министерствойин пресс-гъуллугънаан туврайи мялуматариинди, конкурсдиъ иштирак шулайи мялимариз, чпи апIурайи ляхникан ктибтбан бадали, яна «Гьаз узу классдин руководителди ляхин апIураш» кIуру презентация улупуз, 8-10 дакьикьайин вахт тувнийи. Конкурсдин комиссияйин вакилариз гьарсар иштиракчийин презентацияйин нумрайиз 10-диинакьан кьиматнан баллар дивуз ихтияр айи.

Му ражари региондин дережайиъди кIули гъубшу «ВаритIан ужур классдин руководитель» конкурсдиъ Табасаран райондин Туриф гъулан кьялан мектебдин мялим, райондин дережайиъди кIули гъубшу му конкурсдин гъалибчи Лариса Аьлимягьямедова иштирак гъахьну. Дугъу конкурсдиъ шубубпи йишв гъадабгъну. Дупну ккундуки, Лариса Аьлимягьямедова, чан пишейихъди аьлакьалу конкурсариъ кми-кмиди иштирак шули, заан хъуркьувалар айи мялим ву. Дугъан хиликк урхурайидарра гьаммишан жюрбежюр конкурсариъ, олимпиадйириъ иштирак шула ва гъалибвалин йишвар гъадагъура.

Къайд дапIну ккундуки, сач кIули гъубшу гьаму конкурсдиъ гъалиб гъахьирра Табасаран райондин Хючнаарин 1-пи нумрайин мектебдин мялим Замира Аьзизова ву.

«Табасарандин нурар» газатдин коллективди, Лариса Аьлимягьямедова гъалибвалихъди тебрик апIури, дугъаз гележегдиъ хъанара артухъ ва аьхю хъуркьувалар ккун апIура.