Улихьна йигъари Дербент шагьриъ ерлешмиш дубхьнайи Лезги театрин дараматдиъ табасаран чIалниинди шиърар урхрударин арайиъ кIули гъубшу «Йиз багъри табасаран чIал» конкурсдин натижйир гъивну.
Серенжемдиъ Табасаран, Хив, Дербент районариан ва Мягьячгъала, Каспийск, Дербент, Дагъустандин Огни шагьрариан 100-тIан артухъ бицIидар иштирак гъахьнийи.
Лезги театрин зал, гьеле гьириндин сяаьт урчIвуб хьайизра, баяр-шубари, дурарин абйир-бабари ва жара касари абцIнайи.
Серенжемдин тешкилатчйир вуйи «Табасаран райондин жигьилар» ва «Хив райондин жигьилар» жямяаьтлугъ тешкилатарин вакилари, конкурсдин иштиракчйирин ва дурарин абйир-бабарин варидарин мумкинвалар сабсдар дарувал гьисабназ гъадабгъну, Табасаран ва Хив районариан хайлин бицIидар ва дурарин абйир-бабар машинариъди хувал тешкил гъапIну.
Серенжемдиъ иштирак шулайи бицIидарин арайиъ аьшкь ктру, гъалибвалик миж ктриврайи, бегьемди гьязур духьну адру бицIидар гьичра адайи. Магьа, мисалназ, узу сюгьбат гъубху Зарифа Мягьямедова Табасаран райондин ЦIуртIил гъулан мектебдиъ табасаран чIалнан ва литературайин дарсар киврайи мялим ву. Конкурсдиз думу чан 4 ученик хъади дуфнайи. Дурарикан сари – Ибрагьим Шихягьмедовди – конкурсдиъ 2-пи йишв гъадабгъну.
«Узуз конкурс тешкил гъапIу ихь жигьил баяриз чухсагъул пуз ккундузуз. Дурари, конкурсдин гьарсар иштиракчи пешкешариинди ва дипломариинди лишанлу апIбахъди сабси, варидариз мани цIикбар гьивну, Хючнаан миндира-тиндира гъахуз пулсузди транспорт тешкил гъапIну. Уз’ина ихтибарвал дапIну, чпин веледар узухъди шагьриз гьау абйир-бабаризра чухсагъул пуз ккундузуз. Залиъ айи вари бицIидариз табасаран драмтеатри улупу «Зангар датт» спектакль бегьемди кьабул гъабхьну, мидланра гъайри, дурар жара бицIидарихъдира таниш гъахьну, шиърар фици урхуруш, чпиз ужуб тажруба гъадабгъну. Му серенжем ихь хайлин бицIидарин кIваъ гьаммишандиз гъубзрувалиин умудлуди ва гизаф разиди кIураза», – къайд гъапIнийи Зарифа Мягьямедовайи.
Зиярат Кьасумовайин шиир кIару гатдикан вуйи. Сягьнайиина думу кIару гатдин уйинжагъ хьади удучIвну. Кьяляхъна дугъу узуз ктибтганси, дурариз кIулди Табасаран райондин туканариъ дилицну, кIару гату дибрихъиган, лизи гату масу гъадабгъну, дидиз кIару ранг гъивну.
Гъвандикк гъул’ан вуйи Нурдин Муртузялиев гьеле бицIидарин багъдиз гъягъюри ами. Сягьнайиина удучIву дугъу, шиир урхуз ккебгъайиз, залиъ деънайи вари тамашичйирин ва жюрийин фикир чаина жалб апIруганси, арчулну хил за дапIну, аьхю сесниинди «Ассалламу аьлейкум» гъапнийи ва гьаци, гьардин кIвак кучруси, чан шиирра гъурхнийи. Дугъхьан, дугъриданра, тамашичйиринси, жюрийин вакиларин юкIваризра тясир апIуз удукьну, фицики конкурсдиъ иштирак шулайи варитIан бицIи баяр-шубарин дестейин номинацияйиъ Нурдинди сабпи йишв гъадабгъну.
Конкурсдиъ табасаран чIалниинди шиърар урхура-йидарин арайиъ шубуд йисан яшнаъ айи кьюр бицIирра айи. Миди конкурсдин маракьлуваликан, дидин мяналуваликан, диди бицIидарин мелзниин чIал уьбхбаз, гележегдиъ артмиш хьпаз туврайи мянфяаьтлуваликан кIура.
Узуз, мисалназ, Эфриза Юсуфовайи, Аксана Мурадо-вайи, Фатима Шябановайи, Эльнара Абиевайи, Жамиля Ражабовайи, Сефер Кьасу-мовди, Алия Демировайи фици чпин шиърар урхураш, кьабул гъабхьунзуз.
Хъа, Хив гъул’ан вуйи Карина Исаевайи ихь машгьур шаир Шамил Къазиевдин «Бабан чIал» кIуру шиир урхруган, залиъ хътабгъурайи нефес ебхьуйи. Дугъу шиир урхбан кьяляхъ, узуз табасаран чIал хъана артухъ ккун гъабхьивал гьисс гъапIунза. Дугъхьанра тамашичйирин кIвахьна рукьуз гъабхьну.
Конкурсдин асас тешкилатчи Муса Гьябибовди ва жюрийин председатель Шарафудин Дашдемировди конкурсдин кьяляхъ ич сюгьбатнаъ къайд гъапIганси, кюмекчйир хътарди сар-кьюр касдихьан му конкурс тешкил апIуз шлуб дар. Дурари РД-йин Халкьдин Собраниейин депутат Марат Аслановдиз ва дугъан дустариз, Табасаран ва Хив районарин гьарсаб гъул’ан вуйи, чпиз кюмек гъапIу жигьилариз чухсагъул мялум гъапIну.
Конкурсдин пешкешарин фонд 27 агъзур манат вуйи. Гъалибвалин йишвар 9 вуйи: шубуб – 1-пи йишвар, шубуб – 2-пи йишвар ва шубуб – 3-пи йишвар.
