Улихьна йигъари Воронеж шагьриъ спортдин талитарин «ММА-SERIES» тешкилатди ММА спортдиан вари хъалкьарин арайиъ вуйи талитар кIули гъухну. Думу серенжемариъ ихь ватанагьлийирра иштирак гъахьну – 70 килойин гъагъишнан категорияйиъ Табасаран райондин ЧвулатI гъулан агьали Имран Пашаев ва 105 килойин категорияйиъ ГьепIил гъулан агьали Рягьман Абасов.

 

 

Санкт-Петербургдин «ЯМ» спортдин клубдин дахилнаъди турнириъ иштирак гъахьи Имран Пашаев Узбекистандиан вуйи спорт-смендин зиин, 3-пи раунддиъ думу «бугъмиш» дапIну, гъалиб гъахьну.

Москва шагьрин командайин дахилнаъди турнириъ иштирак гъахьи Рягьман Абасовра, чахъди кчIихбариз удучIву азербайжан спорт-смен 3-пи раунддиъ нокаутдиз гьаъну, талитарин гъалибчи гъахьну.

Му турнириъ Рягьман Абасовдин секундантдин вазифйир тамам апIурайи Гюлягьмед Аьлиаскеровди «Табасарандин нурар» газатдиз туву мялуматаринди, Назим Абасовдин хиликкди гьязур шулайи Рягьмандин гьаму талитар, ММА спортдин пишекарвалин рякъюъ 2-пи ражари вуйи талитар ву. Дугъу мушваъ чак кайи гьунарар уччвуди улупну.

Ихь спортсменар гъазанмиш гъапIу гъалибвалихъди «Табасарандин нурар» газатдин терефнаан тебрик апIурача.