Сачдихъанмина Урусатдин 63 регионариъ, гьадму гьисабнаъди Дагъустан Республикайиъра, агьалйириз кюмек вуди «Хулар газдихъди тямин апIбан ляхнар кIули гъахру яшайишдин программа» тамам апIура. Дагъустандиъ му программа уьмриз кечирмиш апIувал региондин Глава Сергей Меликовдин гюзчиваликк кка.
Улихьна йигъри вахтназ вуди РД-йин Правительствойин председателин вазифйир тамам апIурайи Аьбдулмуслим Аьбдулмуслимовдин регьберваликкди республикайин хулар, дараматар табиаьтдин газдихъди тямин апIбан ляхнариз бахш дапIнайи совещание гъабхьну. Думу совещание-йиъ, му программайиинди чпин дараматар табиаьтдин газдихъди тямин апIбан ляхнар кIули гъахуз республикайин 1500-тIан артухъ аьрзйир агьалйири тувна кIури, къайд гъапIну. Улупнайи кьадарнакан 313 аьрзайиинди газ зигуз сарун йикьрар йитIна, 94 хулар али жилин аьтрафарихънакьан газ зигбахъди аьалакьалу вари ляхнар аьхирихъна дуфна ва гъийин йигъаз программайин дахилнаъди республикайиъ 64 хулар али участокарихъна газ деебтна.
Къайд апIуз ккундузузки, республикайиъ программа уьмриз кечирмиш апIури, программайин зиин ляхин апIурайи касари хулар дивнайи жилин аьтрафариина газ зигбан тикилишчивалин ляхнар гъахбан вахт улупнайи план (План-график) гьязур дапIна. Му пландиз асас вуди республикайиъ 2021-пи йисан газ дизигну ккуни хулар али участокарин кьадар 26 агъзур, хъа 2022-пи йисан – 51 агъзур ву. Натижайиъ газ зигуз вахт улупнайи пландик кирчдар 2147 хулар ву. Гьадму кьадарнакан 101 хулар 2021-пи йисаз ва 2046 хулар – 2022-пи йисаз.
Совещаниейин иштиракчи, вахтназ вуди РД-йин энергетикайин ва ЖКХ-йин ляхнариз лигру министрин вазифйир тамам апIурайи Ризван Мурадовди мялум гъапIганси, гъийин йигъан варитIан асас месэлйирикан саб – дагълу районарин гъулариъ яшамиш шулайи инсанарин хулариз газ дизигну, дурарин яшайишдин ери за апIувал ву. Гьаддихъди сабси муниципалитетаринна экономикайинра яшайишдин артмиш’вал за хьибди.
Му месэлайин гьякьнаан улхури, министри «Табасарандин нурар» газатдиз туву мялуматариинди, республикайиъ газ зигбан турбйир жара апIру 25 станцйир а. Дурариз ляхин апIуз лап гъагъиди алабхъура. «Кечирмиш апIурайи программайиинди, гьамус му станцйирик хъанара артухъси газран турбйир китIди. Дарпиди гъибтуз шулдар, саспи участокариъ газран турбйир гъягъюра, амма газран кьувват зат адар. Яна, пуз шулуки, турбйир дизигна, хъа думу турбйириъ газ адар. Му аьгьвалатра дигиш апIбан ляхнар кIули гъахурача», – гъапнийи министри.
Мидланра гъайри, Ризван Мурадовдин гафариинди, «Хулар газдихъди тямин апIбан ляхнар кIули гъахру яшайишдин программайиъ» иштирак хьуз республикайин агьалйирихьан аьрзйир кьабул апIура. Думу аьрзйир вари муниципалитетариъ айи 43 МФЦ-йин филиалариъ, республикайин газдихъди ляхин апIурайи 39 гъуллугънан идарйириъ ва районарин администрацйириъ кьабул апIура. Хулар али жилихъна газ зигбан вари ляхнар пулсузди тамам апIурайидар ву. Эгер ичв участокарихъна газ зигувал чарасуз лазим вуш, программайиъ иштирак хьпан бадали, аьрза тувуз гьяракат апIинай.
