15 февраль – интернационалист эскрар
кIваин апIбан Йигъ

 

Афгъанистандиан совет кьушмар адаъхъанмина 33 йис тамам хьувалихъди аьлакьалу вуди ихь уьлкейин гизаф шагьрариъ ва гъулариъ 15-пи февралиъ Афгъанистандиъ чпин интернационалвалин буржи тамам гъапIу эскрарихъди жюрбежюр серенжемар тешкил гъапIну.

 

Му йигъан Табасаран райондин культурайин хулаъра тялукь йигъинжагъ кIули гъубшну.

 

Шадвалин мярака жикъи улхбиинди Табасаран райондин культурайин, спортдин ва туризмдин управлениейин кIулиъ айи Аьбдулвагьаб Аьбдуловди ачмиш гъапIнийи. Чан удучIвну улхбаъ дугъу Афгъанистандин халкь душмнарихьан азад апIбаъ ихь уьлкейин, гьадму гьисабнаан Табасаран райондинра, эскрари улупу гьунарарикан, ислягь уьмриъ дурариз айи хъуркьуваларикан гъапнийи. Табасаран райондин главайин заместитель Заур Мусаевди чан улхбаъ Афгъанистандин агьалйири совет эскрарин гьунарар гъира кIваълан гьархну адруваликан, эскрар чпин буржийихьна лап намуслувалиинди янашмиш хьуваликан ва думу дугъриди тамам апIувалин гьякьнаан хайлин гафар гъапнийи. Афгъанистандиъ чпин интернационалвалин буржи тамам гъапIу Табасаран райондин агьалйириз дугъу йигъинжагъ мубарак ва дурариз хизандиъ хушбахтвал, ляхниъ хъуркьувалар ккун гъапIнийи.

Серенжемдиъ удучIвну улхури, Табасаран райондин военкомдин заместитель Надир Шихаьгьмедовди мяракайиъ иштирак шулайи афгъанлуйирин гъуллугънан важиблувал къайд гъапIнийи. «Совет гьюкуматдин, хъасин Урусатдин эскрар саб хайлин дявйириъ иштирак гъахьну. Гьамусяаьт Сирияйиъ террористариз аькси вуйи дявдиъ иштирак шула. Афгъанистандин дяви 9 йисанна 1 вазлина 18 йигъан кIули гъубшнийи. Табасаран райондиан думу дявдиъ 78 кас иштирак гъахьнийи. Дурарикан 3 кас кьяляхъ гъафундар: Ярса гъул’ан Исмяил Исмяилов ва Хьарагъ гъул’ан вуйи Нурудин Нурачев дявдиъ гъи-йихну, хъа ТIивак гъулан агьали Юсуф Аьбдурашидов шил имдарди гъудургну.

Табасаран райондиан «Уьру хяд» орденарихъди 5 кас лишанлу дапIна: Демирбег Рамазанов (Гурихъ гъул), Аьли Мягьямедов (Хючна), Тажудин Сефербегов (ГьепIил), Расул Мирзаев (ХустIил), Ханпулат Гебеков (Дарвагъ).

Гьамусяаьт Табасаран райондиъ Афгъан дявдин 60-рихьна ветеранар яшамиш шула. Ватандин гъирагъдиъ вуйи гьядисйириъ иштирак шули, учву ихь уьлкейин милли маракьар уьрхюри гъахьунчва. Учву ва учвухъди гъахьи гъуллугънан юлдшари, гьич сабдихьанра гучI адарди, ичв буржи лайикьлуди тамам гъапIунчва. Шаксузди, учву аьхю шулайи наслиз чIиви нумуна вучва», – къайд гъапIнийи военкоматдин гъуллугъчийи ва Афгъан дявдин ветеранар дурари Урусатдин сяргьятарилан тинди чпин буржи тамам гъапIу Йигъан машкврихъди тебрик гъапIнийи.

Табасаран райондиъ афгъанлуйирин Советдин председатель Рафик Кьасумовди афгъан халкь азад апIбаъ совет эскрари улупу гьунарарикан, гъийин уьмриъ дурариз алахьурайи читинваларикан ктибтнийи. Чан удучIвну улхбан аьхириъ дугъу йигъинжагъ тешкил гъапIдариз, Табасаран райондин кIулиъ айидариз чпиз гьамциб фикир туврайивализ аьхю чухсагъул мялум гъапIнийи.

Райондин культурайин хулан пишекрар, Дагъустандин культурайин лайикьлу гъуллугъчйир Закарья Амирбеговди, Арсен Аслановди ва гьацира Рустам Рамазановди Афгъан дявдин иштиракчйириз жикъи концерт улупнийи.

Афгъан дявди хайлин жигьилар сагъ’валихъ ва уьмрихъ ва мягьрум гъапIну. Гъит, ихь гъийин жигьилариз анжагъ ислягь уьмриъ гъуллугъ апIувал кьисмат ибшри.