Картуф ухьу хурагнаъ ишлетмиш апIурайи асас итIру сурсатарикан саб ву. Дидкан жюрбежюр хурагар гьязур апIуру. Думу, ипIуз ицциб вуйиганси, бедендиз хайирлу шей’ар кайивалииндира адлу ву. Дидик гизаф витаминар ва минералар ка, диди инсандиз жюрбежюр уьзрарихьан сагъ хьузра кюмек апIуру. Яна картфарин хайирлу терефар гизаф ву. Ихь республикайин агьалйирира думу битмиш апIбаз аьхю фикир тувра, гьаз гъапиш думу ихь кевшенариин ужуди битмишра шулу.

Табасаран райондиъ, месела, ккудубшу йисан агьалйири думу мейва 530 гектариъ гъубзнийи ва 5088 тонна уч гъапIнийи. «Табасаран район» МР-ин гъулан мяишатдин отдел» МБУ-йин улупбариинди, агьалйири кьялан гьисабниинди гьарсаб гектариан 96 центнертIан цIиб дарди бегьер гъадабгъувал гьисаб шула. Ццийин гъулан мяишатдин йисанра райондиъ картфар кивбаз тялукь фикир тувра. «Ццийин йисанра картфар кивру йишвар цIиб хьидар, картфар кIул’инди вуйи дилаварчи касари ва агьал-йири чпин хусуси кюмекнан мяишатариъ урзура, гьамусяаьт картфар урзбан кампания аьхирихъна гъюра», – мялум гъапIну гъулан мяишатдин отделиъ.

 

Гьич аьгъяйчвуз?

*Картуф 80%-тIан зина штукан ибарат ву, дидик гизаф витаминар ва минералар ка, иллагьки уларин рябкъувализ мянфяаьтлу провитамин А.

*Дюн’яйиъ варитIан багьа вуйи «La Bonnotte» сортнан 1 кг картфарин кьимат 500 евро ву. Думу картфар анажагъ хилариинди уч апIуру ва Францияйин саб областдиътIан битмиш шуладар.

*Жюрбежюр уьлкйириъ картфиз ядиграр дивна – Минск (Беларусь), Бесекеже (Польша), Маринск (Урусат) шагьрариъ.

*ВаритIан аьхю картуф Ливандиан вуйи фермери битмиш гъапIну – дидин гъагъ 11 кг вуди гъабхьну.