Хив райондин Мажвгул гъулан мектебдиъ мялимди лихури, Мейлан Нежефовдин 6 йис шула. Педучилище ккудубкIбан кьяляхъ, сифтейин шубуд йисан дугъу ккергъбан классариз дарсар киври гъахьнийи, хъасин мектебдин директорин теклифниинди Мейлан ДГУ-йин филологияйин факультетдик урхуз кучIвну ва бабан, урус чIалариан ва литературйириан дарсар кивру мялимдин пишекарвал гъадабгъну.
2017-пи йисан багъри мектебдиъ Мейландиз бабан чIалнан дарсар кивру кабинет жара гъапIнийи. Ва гъийин йигъаз дугъу чан кабинет Хив райондиъ варитIан ужуб кабинетдиз илтIибкIну.
Гьаму йигъари Мейлан Нежефов чан 10-пи классдиъ урхурайи чи Маликайихъди «Табасарандин нурар» газатдин редакцияйиз хялижвди гъафну.
Къайд апIуз ккундучузки, Малика Нежефова цIиб улихьнаси «Табасарандин нурар» газатди тешкил гъапIу «Йиз дада дюн’яйиъ варитIан ужур ву» конкурсдиъ пешкешнан йишвар гъадагъдарикан сар ву. Редакцияйиъ дугъаз чан пешкешар ва диплом багъиш гъапIну.
Газатдин журналистарихъди вуйи сюгьбатнаъ Мейлан Нежефовди гъийин йигъан Мажвгул гъулан мектебдиъ айи аьгьвалатнакан, китабар гьуркIри адрувалихъди аьлакьалу вуди арайиз гъюрайи учIру месэлйирикан, учв, гьам райондинси, республикайин дережайиъра иштирак гъахьи конкурсарикан, чпи мектебдиъ баяр-шубарин урхувалихьна аьшкь за апIури, гъахурайи серенжемарикан ктибтну.
«Гьамусяаьт Мягьячгъала шагьриъ «Бабан чIалнан варитIан ужуб кабинет» конкурс гъябгъюра. Райондиъ гъалиб гъахьиган, узу му конкурсдин республикайин дережайин пайнаъ иштирак хьуз гьаъну.
Узухьна кабинет туву йисан, думу ккабалгбаъ ДГПУ-йин доцент, аьлим Аьшуряли Аьдиловдин «Бабан чIалнан практикайин курс» китаб гизаф кюмек гъабхьунзуз. Гьадушв’ан узу таблицйир, плакатар, карточкйир гьязур гъапIунза. Мидланра гъайри, цаларик дагъустандин классикарин ва ихь машгьур шаираринна писателарин суратар кайи шиклар керхунза. Бабан чIалнан классдин бинайиинди ва мектебдиъ урхурайи ученикарин кюмекниинди табасаран халкьдин кюгьне деврин алатарин музейра тешкил апIуз мумкинвал гъабхьунчуз. Йиз классдикан 7 дакьикьайин видеоролик гьязур дапIну, конкурсдиъ улупунза. Жюрийиз кьабул гъабхьну»,
– ктибтура Мейлан Нежефовди.
Мейланди мектебдиъ, бабан чIаларилан гъайри, урус чIалнан ва литературайин, музыкайин дарсарра кивра. Мялимвалин пишейихъ юкIв хъайи жигьилариз дугъу, маважибдин бицIи кьадарназ фикир тутрувди, кIваъ айи кеспи гъадабгъувалин теклиф гъапIну. Дугъу гьацира юкIв хъади апIурайи ляхин удукьруваликан, диди мянфяаьт хруваликан, гележегдиъ натижйирра ва заан маважибра шлуваликан гъапнийи.
Хъа Маликайи, чаз мектебдиъ варитIан кьабулдар химияйин дарсар вуйиваликан, думу дарс киврайи мялим, мектебдин директор Амир Хидиров кIулиъ ади вари мялимарин бицIидарихьна вуйи ужуб янашмиш’валикан ктибтури, гележегдиъ чазра мялим хьуз ккуниваликан мялум гъапIну. Гюрюшдиъ дугъу мектебариъ урхурайидариз юкIв хъади дарсар дургъбан, жюрбежюр конкурсариъ иштирак хьпан теклиф гъапIнийи.
