Апрелин 24-пи йигъан Дагъустан Республикайиъ айи Федералин налогарин гъуллугънан Управлениейиъ (УФНС) 2018-пи йисан налогар уч апIбан натижйир гъивну.
Серенжем ачмиш апIури, налогар туврайидарихъди ляхин апIурайи отделин начальник Уьмар Уьмаровди къайд гъапIганси, гъубшу йисан 61,3 миллиард манат налогар уч гъапIну. Думу кьадар 2017-пи йисантIан 9,4 миллиард манатдин артухъди ву. Улупнайи кьадар налогарикан 38,1 миллиард манат республикайиан федералин консолидированный бюджетдиз гъубшну.
РД-йин консолидированный бюджетдиз гъюрайи налогарин кьадарра, сачдихъди тевиган, 4,2 миллиард манатдин артухъ гъабхьну.
Уьмар Уьмаровди сач Табасаран ва Хив районариъ уч гъапIу налогариканра мялуматар тувнийи. Дугъан гафариинди, гъубшу йисан Табасаран райондиъ уч гъапIу налогарин кьадар 16,293 агъзур ву. Думу кьадар 2017-пи йисантIан 3,351 агъзурин артухъ ву.
Хив райондиъ сач 6,062 агъзур манатдин налогар уч гъапIну. Хъа 2017-пи йисан уч гъапIуб 3,744 агъзур манат вуйи.
