Ватандин Аьхю дяви ккудубкIбан кьяляхъра Советарин эскрар, уьлкейин маракьар уьрхюри, Ватанди гьау йи- шваз гъягъюри гъахьну. Гьадрарикан сар Агъамягьямед Аьлимурадовра ву.
Агъамягьямед Аьлимурадович Аьлимурадов 1937-пи йисан Табасаран райондин Лижва гъулаъ нежбрин хизандиъ бабкан гъахьну. Балин шубуд йис вуйиган, дугъан дада кечмиш гъахьнийи. Ватандин Аьхю дявдин ва дидин кьяляхъ гъагъи йисарин читинвалариз дилигди, Агъамягьямед Аьлимурадовди Арак гъулан мектебдиъ 8-пи класс ккудубкIнийи.
1956-пи йисан думу СССР-ин Яракьлу Кьувватарин жергйириъ чан буржи тамам апIуз армияйиз гъушнийи. Агъамягьямед Венгрияйиъ дявдин гъуллугънаъ гъахьнийи. Ватандин Аьхю дявдин йисари Венгрияйи, фашист Германияйин тереф дибисну, дяви ккудубкIайизкьан женг гъабхури гъахьну. Дявдин кьяляхъ думу уьлкейин аьтрафар СССР-и чан тясирлуваликкна гъадагънийи. Гитлериз аькси уьлкйири йитIнайи Париждин ислягьвалин йикьрариз асас вуди, СССР-из Венгрияйин аьтрафариин яракьлу кьувватар уьрхюз ихтияр тувнийи. Гьамци, думуган ихь уьлкейин жигьилар социалист уьлкйирин аьтрафариин ерлешмиш духьнайи дявдин частариз гъуллугъ апIуз гьауйи.
Ватандин Аьхю дявдин кьяляхъ, ихь уьлкейиъси, дяви гъабхьи жара уьлкйириъра яшайишдин аьгьвалат гъагъиб вуйи. Дявдиъ Германияйин тереф уьбхюри гъабхьи Венгрияйи СССР-из, Чехословакияйиз ва Югославияйиз гизаф кьадар буржар тувну ккнудийи. Амма уьлкейиъ думу аьгьвалатнахъди рази дарударин кьадар йислан-йисаз артухъ шулайи. Дурариз чпин йирси къайда тяйин апIуз, хъа СССР-ин кIулиъ айидариз душваъ коммуниствалин гьюкумат уьбхюз ккунди айи. 1956-пи йисан 23-пи октябрилан 9-пи ноябризкьан Венгрияйиъ коммунистарин къайдайихъди рази дарударин митингар, забастовкйир, женгар ккергънийи. Венгрияйиъ гъахьи наразивалин гьяракатар дагъитмиш апIуз СССР-ри душваз аьлава кьувватар гьаънийи. «Вихрь» операцияйин натижайиъ Советарин эскрарин терефнаан 700 кас гъийихнийи ва 1500-диинакьан касариз жюрбежюр зийнар гъахьнийи, Венгрияйин 3 агъзуриинакьан ватандашар гъийихнийи, ислягь агьалйириз зийнар гъахьнийи, Будапешт шагьрин аьхюну пай ккидипнийи. Агъамягьямед Аьлимурадов гьаму гьядисйирин иштиракчи ву. Думу 1956-пи йисхъан мина 1962-пи йисазкьан дявдин гъуллугънаъ гъахьну.
Армияйиъ гъуллугъ кку-дубкIбан кьяляхъ, Агъамягьямед Аьлимурадовди Дербент шагьриъ пассажирар гъахру автотранспортдин карханайиъ 45 йисан автобусдин шоферди гъилихну. Ужуб хасиятнан, чIуру гъиллигъар ктру Агъамягьямед Аьлимурадовдиз коллективдиъ аьхю гьюрмат айи. Дугъан баркаллу зегьмет жюрбежюр гьюрматнан грамотйириинди ва медалариинди лишанлу дапIна.
Венгрияйиъ гъахьи гьядисйирин иштиракчйир дявдин ветеранарик гьисаб ву. Дурари ватанди чпин улихь диву месэла намуслувалиинди тамам гъапIну.
