Улихьна вахтариси дарди, аьхиримжи йисари ихь халкьдин вакилари спортдин жюрбежюр жюрйириан заан хъуркьувалар гъазанмиш апIбан дюшюшар йигълан-йигъаз артухъ шула. Халкьдиз чан кIубан баярикан, дурари улупурайи гьунарарикан аьгъяди ккунду, гьаз гъапиш жвуван ватанагьли урхбаъ, ляхниъ, спортдиъ улихь гъягъруган, кIваз шадвалин, утканвалин гьиссар гъюру, дугъу гъазанмиш гъапIу хъуркьуваларик жвуван пайра кайиганси гьебгъру.

 

Нубатнан ражну мицистар шадвалин, утканвалин гьиссар уягъ гъапIур Ярса гъулан агьали, Мягьячгъала шагьриъ яшамиш шулайи Темирлан Амирханов ву. Грекаринна римдин юкьяр дисбан спортдиъ дугъу гъазанмиш дапIнайи хъуркьуваларикан гъубшу йисан чапдиан удубчIву газатдин 52-пи нумрайиъ «Мектебдиъ имиди чемпион гъахьну» кIуру макьала чап гъапIнийча.

2022-пи йисан 18-19-пи февралиъ Каспийск шагьриъ грекаринна римдин юкьяр дисбан спортдиан 2007-2008-пи йисари бабкан гъахьи, 57 кило гъагъишин айи спортсменарин арайиъ кIули гъубшу Дагъустан Республикайин турнириъ Темирлан нубатнан ражари сабпи йишваз лайикь гъахьну. Гьелбетда, му ихь бажаранлу живандин (дугъу 7-пи классдиъ урхура) аьхю хъуркьувал ву.

Гъит жигьил спортсмен Темирландиз чав кадабгънийи спортдин жюрейиъ варитIан заан кIакIар мютIюгъ ишри!