25-пи февралиъ Дагъустандин Глава Сергей Меликовди кIули гъубху совещаниейиъ республикайин Правительствойин цIийи гъурулуш ашкар гъапIну.
Гьаци, юкьуб ведомствойин кIулиъ айидар дигиш гъахьну. РД-йин зегьметнан ва яшайишдин артмиш’валин министерствойин кIулиъ улихьган Мягьячгъалайин мэрин заместителди лихури гъахьи Аьбдурягьман Мягьмудов, табиаьтдин дакьатарин ва экологияйин министрди – муганайиз РД-йин Главайин ва Правительствойин Администрацияйиъ ляхин апIури гъахьи Ибрагьим Ибрагьимов, транспортдин министерствойин кIулиъ – муганайиз Хасавюрт райондин администрацияйин глава Жамбулат Салавов, хъа РД-йин цифрайин артмиш’валин министрди – улихьган Дагъустандин Главайин пресс-гъуллугънаъ ляхин апIури гъахьи Юрий Гьямзатов тяйин гъапIну.
Гьаддихъди сабси, вахтназ вуди вазифйир тамам апIурайир кIуру гафарихьан РД-йин финансарин министр Юнус Сааьдуев, РД-йин сагъламвал уьбхбан министр Татьяна Беляева, РД-йин культурайин министр Зарема Бутаева, РД-йин образованиейин ва илимдин министр Ягь’я Бучаев, РД-йин физический культурайин ва спортдин министр Сажид Сажидов, РД-йин жигьиларин ляхнарин министр Камил Сяидов, РД-йин юстицияйин министр Къазимягьямад Сефикъурбанов, РД-йин гъулан мяишатдин ва ипIру-убхъру сурсатарин министр Баттал Батталов азад гъапIну.
Чпин ляхин гьацира РД-йин милли политикайин ва диндин ляхнариз лигру министр Энрик Муслимовди, РД-йин туризмдин министр Эмин Мердановди ва РД-йин промышленностдинна алвер апIбан министр Низам Халиловди давам апIиди.
Артур Сулеймановра РД-йин тикилишчивалин министерствойин кIулиъ гъузну. Дугъахьна гьацира архитектурайин ва ЖКХ-йин Комитетдин вазифйирра тувну. ЖКХ-йин вазифйир улихьган энергетикайин министерствойи тамам апIурайи.
Хъа РД-йин энергетикайин министерствойихьна тарифарин Комитетдин вазифйирра тувну, министрди Ризван Мурадов тяйин гъапIну.
Республикайин ЖКХ-йин ва энергетикайин месэлйириз лигурайи РД-йин Правительствойин председателин заместитель Манвел Мажонцдин статус сарпи заместителихьна за гъапIну.
РД-йин жилин ва мал-девлетнан аьлакьйирин министр Заур Эминов, чан гъуллугъра хьмиди, Дагъустандин Правительствойин председателин заместителра гъахьну. Гьацира Дагъустандин цIийи сарпи вице-премьер Руслан Аьлиевра республикайин экономикайин ва артмиш’валин министерствойин кIулиъ гъузну.
Дагъустандин премьерин заместителарди Рамазан Жяфаров, Муслим Телякавов ва Мурад Къазиев гъузну. Дурарин сиягь улихьган Дагъустандин Правительствойиъ премьерин заместителди ва гьацира промышленностдин ва энергетикайин министрди лихури гъахьи, хъасин газдин сетарин гъурулушдиз гъушу Ризван Гъазимягьямедовди бегьем гъапIну.
Дагъустандин чап апIбан ва мялуматарин министерство мялуматаринна чап апIбан Агентствойиз дюнмиш апIбанди ву.
Республикайин сарпи вице-премьерин гъуллугънаъ ади гъахьи Нюсрет Уьмаров РД-йин Халкьдин Собраниейиъ Дагъустандин Главайин вакилди тяйин гъапIну.
Совещаниейиъ Сергей Мели-ковди къайд гъапIганси, Правительствойин цIийи гъурулуш тяйин апIруган, гьарсар касдин 2021-пи йисандин ляхнин натижйир гьисабназ гъадагъури гъахьну.
«Дагъустандиъ бязи вахтари гъуллугъар инсанар бадали ачмиш апIури гъахьну. Гъуллугъар, статусар, кабинетар, машинар – инсанар бадали дюзмиш апIури гъахьну. Гъи думу къайда имдар. Гъи улихь дивнайи вазифйир тамам апIуз шлу инсанар ктагъура», – гъапну Сергей Меликовди.
Дигиш’валар Дагъустандин Главайин ва Правительствойин администрацияйиъра гъахьну. Чан администрация цIийи алапIбакан улхури, Сергей Меликовди къайд гъапIганси, «мянфяаьтсузди ляхин апIури гъахьи аьхю управленйир батIул гъапIну».
КIваин апIурача, РД-йин Правительствойин Председателди Аьбдулмуслим Аьбдулмуслимов тяйин гъапIну.
«Табасарандин нурар» газатдин редакцияйин гъуллугъчйири ихь ватанагьлийир – РД-йин юстицияйин министр Къазимягьямад Сефикъурбанов, РД-йин энергетикайинна тарифарин министр Ризван Мурадов, ва гьацира РД-йин Халкьдин Собраниейиъ Дагъустандин Главайин вакилди тяйин гъапIу Нюсрет Уьмаров гъуллугъариъ дерккбахъди мубарак апIури, му жавабдар ляхнариъ дурариз хъана аьхю гьюрмат ва зурба хъуркьувалар хьуб ккун апIура.
