Украинайиъ гъябгъюрайи хусуси метлеб айи операция себеб вуди, аьхиримжи йигъари ихь кьюбби районарианра (Табасаран ва Хив) лап пашман хабрар ерхьура. Багъри Ватандин аку гележег уьбхюр, гъунши гьюкуматдин аьтрафариин ислягьвал бадали кIули гъабхурайи хусуси метлеб айи операцияйиъ чпин жанар гьяйиф дарапIу касарин ччвурар йигълан-йигъаз артухъ шула.
Гъийин йигъаз айи мялуматариинди, Украинайиъ гъябгъюрайи хусуси метлеб айи операцияйин женгариъ Табасаран райондин Цалак гъулан агьали, 40 йисандин яшариъ айи Самурханов Наврузбег Самурхановичди, Хючна гъулан агьали, 34 йисандин яшариъ айи Сулейманов Мевлан Низамиевичди, Лижва гъулан агьали, 29 йисандин яшариъ айи Гьясратов Аким Фикретовичди, Акъа гъулан агьали, 22 йисандин яшариъ айи Аьрабов Аьраб Аьбдуллагьовичди ва Дербент шагьриъ яшамиш шули гъахьи Хив райондин Асккан Яракк гъулан агьали, 38 йисандин яшариъ айи Ибрагьимпашаев Байрам Агъамягьямедовичди чпин жанар фида дапIну, Ватандин улихь жилирвалин буржи тамам гъапIну.
«Табасарандин нурар» газатдин коллективди, ихь игит баяр вахтсузди кешмиш хьувал дерин пашманвалиинди къайд апIури, дурарин хизанарихъди му хажалат пай апIура ва дурариз мюгькам сагъ’вал ва саламатвал ккун апIура.
